Hatutan.com, (12 Marsu 2022), Dili-Kampaña Kandidatu Prezidente Repúblika (PR) períodu 2022-2027, Francisco Guterres “Lú Olo” nian iha Munisípiu Baucau, termina ho insidente tuda-malu hodi rezulta apoiante ida mate ka lakon vida.

Notísia iha Relasaun: PNTL Detein Autór Na’in-Hitu ba Konfrontu Apoiante Kandidatu PR iha Baucau

Mate isin tau hela iha mortuáriu Ospitál Referal Eduardo Ximenes, Baucau. Foto/Espesiál

Kampaña ne’ebé halibur maiória simpatizante no militante FRETILIN husi Postu Administrativu  neen (6); Baucau Vila, Baguia, Laga, Quilicai, Venilale ho Vemasse ne’e konsentra iha Kampu Komemorasaun 28 Novembru 2021  iha Aldeia Darasula, Suku Gariuai, Postu Administrativu Baucau, Munisípiu Baucau.

Tuir informasaun ne’ebé Hatutan.com asesu husi abitante balun iha Aldeia Darasula katak bainhira kampaña atu hahú no Kandidatu Prezidente Repúblika Francisco Guterres “Lú Olo” husik manu-falur (pombu) semo mosu kedas ona dezentendimentu iha massa nia-leet no barullu iha palku oin.

Advertisement

Fontes ne’e fó sasin katak bainhira komisaun organizadora haree situasaun ne’e, sira hahú halo alerta iha palku leten atu hotu-hotu kalma no mantein trankuilidade. Maibé, husi palku okos hakilar  dehan,  laiha problema tanba sira hakarak duni manu-falur ne’ebé kandidatu PR Lú Olo husik ne’e para sira kaer ba hakiak.

“Teki-teki de’it, purvolta tuku 14:00 Otl, atu ba tuku 15:00 Otl, massa sira duni-malu, tuku-malu no balun halai namkari, ema deskoñesidu lansa tuda ho fatuk mai massa nia-leet, maibé kampaña la’o nafatin. To’o kampaña hotu no kandidatu PR Lú Olo ho nia kometiva sira fila ona, maka ami rona fali dehan, maluk Buibau oan ida mak sai vitima no avakua urjente  ba Ospitál Referál  Eduardo Ximenes, Baucau, mas la konsege salva nia vida,” fontes ne’e informa.

Bainhira situasaun barullu ne’e akontese, halo ema balun trauma no ta’uk hodi halai soe hela sira-nia motór. Nune’e, iha rai atu kalan daudaun, maka joventude sira Aldeia Darasula nian ajuda fali hodi buka fasilita motór na’in mai foti.

“Mezmu iha barullu iha massa nia-klaran no halo ema balun trauma  halai namkari, mas tanba ema barak, kampaña la’o nafatin to’o remata iha tuku 17:00 Otl,” fontes Darasula oan ne’e hakatuir via telefonika husi Darasula.    

Infomasaun seluk husi fontes konfirmadu iha Ospitál Referal Eduardo Ximenes, Baucau konfirma katak, vitíma joventude ida ho idade tinan-21 husi Buibau ne’e nia isin-mate sei  tau hela iha Motuáriu laran hodi hein família sira atu bele lori ba halo prosesu funerál.

Advertisement

“Vitíma ne’e evakua mai iha Ospitál maibé la konsege salva nia vida tanba hetan tuda maka’as iha parte ulun. Mate-isin ne’ebé  hatais hela kamiza kandidatu PR Lú Olo nian agora sei tau hela iha mortuáriu Ospitál Referal Eduardo Ximenes, Baucau,” fontes ne’e hateten via telefónika.

To’o kalan ne’e, tuku 21:57 Otl, situasaun seguransa iha Darasula kontroladu no hakmatek. Komunidade iha aldeia refere ida-idak hakmatek iha nia uma no joventude sira fasilita hela abitante hirak ne’ebé atu foti sira-nia sasán, hanesan motór ne’ebé sira halai husik hela iha besik kampu konsentrasaun kampaña nian.

PNTL Halo Hela Identifíkasaun

Komandante  PNTL Munisípiu Baucau, Superintendente António Maria de Sá. Foto/Media PNTL

Komandante PNTL Munisípiu Baucau, Superintendente Polísia, António de Sá, ne’ebé Hatutan.com konfirma via telefoníka, informa katak ida duni insidente iha ámbitu kampaña kandidatu PR Francisco Guterres “Lú Olo” nian iha área Darasula no daudaun ne’e PNTL halo hela invetigasaun no identifikasaun ba suspeitu sira ne’ebé envolve iha insidente ne’e.  

“Hein lai, ita sei halo hela prosesu, agora dadaun ne’e ami halo hela investigasaun, ami identifíka hela, inklui halo kapturasaun ba suspeitu ne’e, ne’ebé naran ita ceek lai, kuandu sira fó ona relatoriu mai, prontu, ne’e ha’u sei fó ba ita-boot sira. Ne’ebé relatóriu ha’u seidauk simu,” António de Sá hateten.

Nia hatutan, prosesu investigasuan maka sei bele konfirma katak kazu ne’e nia motive  mai hosi partidu ka husi ema terseira parte, tanba ohin akontese, iha duni momentu ida kampaña hela. Purtantu, Prezidente  Repúblika, kandidatu númeru 06, sei ko’alia hela, mosu insidente ne’e iha massa nia-klaran hodi rezulta  sira halo joven ida mate.

Advertisement

“Sira baku-malu duni, entaun, ida ohin vitima ne’e, lori mai Ospitál, la konsege salva. Ne’ebé ninia fatin ne’e, Buibau, autór ne’e mós hosi fatin ne’ebé hanesan Buibau. Ne’ebé, oras ida kuandu autór ne’e ita kaptura ona mai, ha’u simu ona relatóriu hosi ami nia investigasaun, prontu, hau fó fali informasaun ba ita-boot sira Hatutan.com, nune’e ita nia up-date ba malu,” Superintendente Polísia ne’e lia tun tán.

Na’in-rua Ona Lakon Vida

Durante kampaña eleisaun prezidensiál iha Timor-Leste hahú iha loron 02 fulan-Marsu ne’e to’o mai ohin loron, rejista ona ema ka apoiante na’in-rua mak lakon vida.

Apoiante ida husi kandidatu Prezidente Repúblika 2022-2027, Jenerál Reformadu, Lere Anan Timur nian lakon vida iha asidente ne’ebé akontese iha área Laivai, Postu Administrativu Lautem, Munsípiu Lautem iha loron 04 fulan-Marsu ne’e.

Apoiante Kandidatu PR Lere Anan Timur nian ne’e lakon vida iha  asidente karreta baskolante ida ho numéru matrikula 60.071, ne’ebé transporta sira  baku-fila iha área Laivai, Postu Administrativu Lautem hodi rezulta  na’in-ida mate no na’in-tolu seluk kanek.

Advertisement

Akontesimentu ne’e, iha Aldeia Tubaliu, Suku Ililai, Postu Administrativu Lautem, Munisípiu Lautem, iha loron 04 fulan-Marsu 2022, purvolta tuku 22:30 Otl.

Ba dala-ida ne’e, apoiante husi kandidatu PR Francisco Guterres “Lú Olo” nian ida lakon vida iha akontese dezentendimentu iha ámbitu kampaña ne’ebé  konsentra iha Aldeia Darasula, Suku Gariuai, Postu Administrativu Baucau Vila, Munisípiu Baucau.

Jornalista: Regerio Cárceres

Advertisement