Hatutan.com, (14 Marsu 2022), Díli—Governu liuhosi Ministru Defeza (MD), Filomeno da Paixão de Jesus, realiza sorumutu ho embaixadór Austrália, Bill Costello hodi kontinua halo diskusaun kona-bá kooperasaun militár liga ho modernizasaun no dezenvolvimentu instituisaun FALINTIL Forsa Defeza Timor-Leste (F-FDTL).

Ministru Defeza (MD), Filomeno da Paixão de Jesus. Foto/Hatutan.com.

“Ami ko’alia kona-bá kooperasaun ne’ebé la’o daudaun ho Austrália, liu-liu iha área Defeza. Ita aprezenta kestaun sira ne’ebé todan liu, liu-liu kona-bá modernizasaun ho dezenvolvimentu kapasidade F-FDTL,” Ministru Defeza (MD), Filomeno da Paixão de Jesus hateten ba jornalista sira hafoin sorumutu iha Kuartél Jenerál F-FDTL, Fatuhada, Segunda (14/03/2022).

Notisia iha Relasaun:Militár EUA ho F-FDTL Hahú Halo Reabilitasaun Konjuntu Bá Aeroportu Baucau

Durante diskusaun, Filomeno Paixão aprezenta pontu importante haat ba embaixadór foun, Bill Costello, ho adidu militár Australia nian, kona-bá kooperasaun sira ne’ebé antes ne’e halo tiha ona ho Petter Roberts.

Asuntu primeiru, kona-bá akordu kooperasaun entre Austrália ho TL iha área defeza, nomós iha SOFA ho Austrália.

Pozisaun TL nian ba akordu SOFA ne’e ho intensaun katak, bainhira forsa Australianu sira ne’ebé mai atua iha Timor, jurídikamente bele garante sira nia seguransa iha TL.

“Ida ne’e mak ita nia hanoin no sei diskute hela, iha SOFA ne’e mak  ita haree,” Filomino da Paixão de Jesus esplika.

Daudaun-ne’e, Amérika mak nasaun dahuluk ne’ebé halo ona akordu ne’e, no agora TL tán no Austrália.

“Provizoriamente, agora ita iha nasaun ida de’it ho Amérika, no agora ita hakarak ho Austrália,” Paixão haktuir tán.

Iha parte segundu, kona-bá pakote sira seguransa marítima nian ne’ebé sei tama hotu ba iha Portu Hera nian, nune’e bele asegura Ró Guardian Patrolla, ne’ebé tuir planu iha 2023 sei to’o iha TL.

Iha asuntu terseiru, kona-bá treinamentu operasaun ró ba membru F-FDTL sira, inklui manutensaun ba ró rua ne’ebé atu mai.

Nune’e, atu responde ba ida-ne’e, ministériu defeza hamutuk ho Komandu F-FDTL, prepara ona membru hamutuk na’in-60 ba partisipa formasaun kona-bá ró nian iha Austrália, no bainhira ró ne’e mai TL, sira rasik mak kondús.

Iha diskusaun ikus liu, kona-bá asisténsia ba iha dezastre naturál nian, iha ne’ebé ministru Filomeno Paixão husu ba embaixadór foun Austrália, atu bele fó kapasitasaun ba membru F-FDTL.

Nune’e mós diskute kona-bá peace keeping operation, oinsá mak Austrália bele fó apoia kona-bá infraestrutura ne’ebé sei halo iha área defeza, inklui planu mestre (master plan) mak daudaun ne’e, la’o iha Metinaro ho Baucau ba 2023 to’o 2027.

“Ida ne’e mak importante liu ha’u atu fó hatene ba povu TL tomak hodi hatene, katak ita-nia kooperasaun agora ho Austrália la’o di’ak tebe-tebes, no sei di’ak liután. Ita espera katak, ho ró sira ne’e mai, ita sei garante seguransa iha Kosta Norte np Kosta Súl,” nia subliña.

Oras ne’e, ró boot rua F-FDTL nian ne’ebé durante halo operasaun iha Kosta Norte, sei iha manutensaun iha Xina no tuir planu tinan ida ne’e sei to’o TL atu bele reforsa tán ho ró boot rua seluk, ne’ebé mai hosi Austrália.

Durante ne’e governu Austrália fó ona nia kontribuisaun barak tebes ba TL, liu-liu iha área defeza nian no iha membru FALINITIL Forsa Defeza Timor-Leste nian, liu 500 ona mak sai ona benefisiáriu ba formasaun iha Austrália, hodi hasa’e kualidade rekursu umanu.

Jornalista: Rogério Pereira Cárceres