Hatutan.com (15 Marsu 2022), Díli—Atuál Prokuradór Jerál Repúblika (PJR), Alfonso Lopez sai lezadu ba krime ameasa no arma branka ne’ebé deskonfia komete hosi arguidu na’in-rua, MSB ho PPSC hasoru lezadu tanba utiliza tudik hodi ameasa no husu osan ba lezadu.

Audiénsia julgamentu ne’ebé hala’o iha loron 15 fulan ne’e, Tribunál Distritál Díli (TDD) seidauk bele rona arguidu sira, tanba Tribunál la konsege notifika arguidu na’in-rua no laiha informasaun kona-bá arguidu na’in-rua nia paradeiru.

Tanba ne’e, liu hosi desizaun juiza Ercilia de Jesus husu ba Polísia atu buka-tuir paradeiru hosi arguidu sira nune’e bele halo notifikasaun direta, tanba antes ne’e liu hosi primeiru interrogatóriu TDD aplika ona medida koasaun ba arguido sira.

Advertisement

Atuál PJR rasik la marka prezensa iha TDD, maibé liu hosi informasaun ne’ebé hato’o hosi ofisiál justisa katak, bainhira julgamentu la’o maka PJR sei marka prezensa no bainhira halo adiamentu maka PJR hein atu TDD notifika fali ba loron ne’ebé TDD deside.

Bazeia ba razaun hirak ne’e maka TDD adi’a hikas julgamentu ba loron 17 fulan Maiu tinan ne’e, hodi rona arguidu sira.

Tuir akuzasaun hosi Ministériu Públiku (MP) katak, iha loron 13 fulan Dezembru tinan 2019 iha tuku 13:50, bainhira fila hosi Solat iha Masjid Al Munawwarah Travessa de Ai-kameli, Aldeia 04 Marconi Fatu-hada Dili, iha dalan arguidu na’in-rua hosi kotuk bolu dehan hein lai, nune’e lezadu mós hein.

Bainhira arguidu besik ba lezadu no arguidu MSB hasai tudik hodi sé ba lezadu nia kabun hodi husu osan no arguidu PPSC hamrik metru ida ho katana, lezadu hakfodak hodi lamas osan, maibé osan laiha.

Tanba ne’e, fó hatene ba arguidu katak la lori osan no lezadu la’o lalais, maibé arguidu na’in-rua kontinua tuir to’o iha kruzamentu mak foin para.

Advertisement

Bainhira to’o iha uma, lezadu telefone kedan ba Polísia hodi mai iha fatin akontesimentu no halo kedan detensaun ba arguidu PPSC,.

Tanba ne’e, MP akuza arguidu na’in-rua ba prátika krime rua hanesan ameasa ne’ebé previstu iha artigu 157 no krime arma branka tuir Lei númeru 5/2017.

Audiénsia julgamentu ne’e prezide hosi juiza Ercilia de Jesus, MP reprezenta hosi Prokuradór Renato Berenahak no arguidu sira hetan asisténsia legál hosi Defensór Publiku Fernando Carvalho.

Jornalista: Carmelita Isaac

Advertisement