Hatutan.com, (16 Marsu 2022), Dili-Kompaña ikus kandidata Prezidente Repúblika (PR), Armanda Berta dos Santos, Kuarta (16/03/2022), iha Kampu Alor, Dili, hato’o   agradesementu boot ba apoiante sira tomak husi partidu Kmanek Haburas Unidade Nasionál Timoroan (KHUNTO), tanba durante ne’e, fó ona sira-nia apoiu ba ninia kandidatura ba Prezidente Repúblika períodu 2022-2027.

Notísia iha Relasaun: Armanda Berta Hakarak Sai Xefe Estadu Ne’ebé Hametin Identidade Kulturál

Kandidata PR 2022-2027, Armanda Berta dos Santos akompaña husi Konselleiru Másimu Partidu KHUNTO, José dos Santos “Naimori” ensera kampaña iha Kampu Alor, Dili, 16 Marsu 2022. Foto/Hatutan.com

“Nu’udár kandidatu ba prezidente iha 2022-2027, ne’ebé mai hosi povu ki’ik nia oan, iha biban espesiál ida-ne’e, hosi fuan laran, ha’u agradese ba  imi hotu ne’ebé fó ona imi nia kartaun eleitóral hodi bele apoiu mai ha’u nia kandidatura ida-ne’e,”, Armanda Berta dos Santos hateten.

Armanda Berta dos Santos, kandudata PR ho númeru sorteiu 09 hato’o nia agradesementu espesiál lider boot liu (supremu) partidu KHUNTO nian, José dos Santos Bucar “Naimori”, no mós ho estrutura tomak partidu nian, ekipa susesu sira hosi baze to’o nasioná  ne’ebé fó suporta másimu ba ninia kandidatura.

Kompromete Hala’o De’it Kna’ar PR

Durante intervensaun polítika iha kampaña eleitóral ikus liu iha Munisípiu Dili, Armanda Berta dos Santos, promete katak, bainhira povu fó duni fiar ba nia hodi eleita nudár Prezidente Repúblika (PR), sei hala’o de’it kna’ar ne’ebé koalia iha nia kompeténsia hanesan Prezidente Repúblika.

Kona-bá misaun no vizaun, Armanda Berta afirma katak, sei hametin pás no tane aas Estadu direitu, progresu no prosperiedade ba povu tomak nia moris di’ak.

Tuir Berta, bainhira povu hotu moris ona iha pás, maka sei akontese dezenvolvimentu. Maibé, sé laiha pás, mak dezenvolvimentu mós sei la la’o.

 “Sé karik ha’u eleitu nu’udár PR, mak ha’u sei halo relasaun di’ak ho nasaun viziñu sira no mós nasaun sira hotu-hotu, hodi bele haree ba ita-nia nasaun ne’ebé durante ne’e, ita-nia nasaun parseiru sira ajuda mai TL,” Armanda Berta hateten.

Jornalista: Rogério Pereira Cárceres