Hatutan.com, (22 Marsu 2022), Díli- Kandidatu Prezidente Repúblika (PR) husi partidu FRETILIN, Francisco Guterres “Lú Olo” rejeita hetan “derrota” iha primeira ronde eleisaun ba Preizdente Repúblika, 19 fulan-Marsu ne’e.

Notísia iha Relasaun: Kontajen Finál, Ramos-Horta Kontinua Lidera ho Votu 301,481

Kandidatu Prezidente Repúblika, Francisco Guterres “Lú Olo”. Foto/Espesiál

Responde jornalista sira iha Palásiu Prezidensiál, Dili, Tersa (22/03/2022), Kandidatu PR ho númeru sorteiu 6, Francisco Guterres “Lú Olo” afirma, nia la konkorda uainhira públiku hateten katak nia kandidatura “derrota” ka lakon iha primeira volta tamba laiha kandidatu ida mak manan maioria iha primeira volta, nune’e obrigadu tenke hakat ba segunda volta eleisaun prezidensiál.

“Laiha kandidatu ida mak manan no so rezultadu segunda volta mak sei determina se mak manan no lakon,” Lú Olo afirma tán.

“Ha’u la konkorda ho derrota tamba José Ramos-Horta la manan iha primeira volta no ami rua sei kompete iha segunda volta, signifika laiha ida mak manan no lakon iha primeira volta,” Francisco Guterres “Lú Olo” hateten.

Atu iha aliansa ida forte iha segunda volta eleisaun prezidensiál ekipa susesu kandidatu partidu FRETILIN ne’e servisu maka’as liu husi komunikasaun ho partidu polítiku sira hotu ne’ebé iha no liuliu ho kandidatu sira seluk ne’ebé laliu iha eleisaun segundu volta ne’e.

“Ami kontaktu ona ho sira hotu, ha’u la presiza mensiona naran, inklui mós Tenente Jenerál reformadu Lere Anan Timur. Ami kontaktu ona,” Lú Olo haktuir.

Lú Olo afirma sei koordena ho apoiante, militante no portavós kampaña sira atu mellora ka hadi’a liafuan sira durante kampaña atu povu bele rona ho mós hodi fó sira-nia votu tuir saida mak sira komprende liga ho programa, misaun no vizaun kandidatu nian.

Kandidatu rua ne’ebé pasa ba segundu volta eleisaun prezidensiál ne’ebé sei realiza iha loron 19 fulan-Abríl 2022, maka kandidatu husi partidu CNRT, José Manuel Ramos-Horta ne’ebé nudár kandidatu mais votadu iha primeira ronde ho votu 301, 481 (46,58%) no kandidatu segundu mais votadu husi partidu FRETILIN Francisco Guterres “Lú Olo” ne’ebé hetan votu 143,408 (22,16%).

Jornalista: Vito Salvador