Hatutan.com, (24 Marsu 2022), Díli- Konferénsia Episkopál Timorense (CET, sigla protugés) husu kandidatu prezidente republika ne’ebé kompete iha eleisaun prezidensiál ba segunda volta atu  mantein pás no estabilidade iha ámbitu kampaña.

Notísia iha Relasaun: PNTL Konfirma Apoiante Lú Olo Mate iha Ámbitu Kampaña

Arsebispu Arke Dioseze Dili, Dom Virgílio do Carmo da Silva, SDB. Foto/Hatutan.com

Tuir oráriu husi Komisaun Nasionál ba Eleisaun (CNE) ne’ebé publika ona antes karik akontese eleisaun segunda volta, maka hahú loron 02-16 fulan-Abríl sei hakat ba kampaña eleisaun prezidensiál nian no iha loron 19 fulan-Abríl 2022, eleisaun ba Prezidente Repúblika segunda volta.    

Arsebispu Arke Dioseze Dili, Dom Virgílio do Carmo da Silva, SDB, hateten kampaña eleitorál segundu volta nian la’ós de’it iha ámbitu kuarezma, maibé monu mós iha selebrasaun loron-boot festa páskua, ne’ebé hanaran Tridu Paskál, tanba ne’e, kandidatu sira tenke garante atu evita hasai liafuan kro’at ne’ebé provoka situasaun no hamosu konflitu entre apoiantes sira.

“Hodi igreja no povu nia lian, ita husu atu iha Tridu Paskál kampaña kandidatu sira nian la’o ho pás  no ita hein responsta husi nai ulun sira,” Dom Virgílio do Carmo da Silva hateten.

Aresebispu ne’e husu ba foin-sa’e feto no mane sira ne’ebé hatudu tiha ona maturidade polítika hodi akompaña iha eleisaun primeira volta nian, hahu kedas husi kampaña eleitorál  to’o ba eleisaun no tama ba prosesu kontajen votu nian ne’ebé hatudu kandidatu rua tenke fila hikas ba palku polítika hodi halo kampaña atu manan povu nia simpatia, ne’e dunik mantein ho hahalok diak hotu tamba ida ne’e maka valor lolos nudar ema kristaun ne’ebé fiar iha Kristu.

“Ema ida-idak iha nia preferénsia, maibé demokrasia ejize ita atu respeita malu, respeita ema seluk nia liberdade,” nia sublina.

Dom Virgílio konsidera demokrasia iha Timor Leste sei foun loos, maibé ho maturidade polítika ne’ebé Timor Leste iha hatudu pasu pozitivu no hakat foun ida hodi lori imajen Timor Leste ba oin.

Jornalista: Vito Salvador