Hatutan.com, (23 Jullu 2023), Baucau—Segundu Bispu Dioseze Baucau, Dom Leandro Maria Alves, Domingu (23/07/2023),  prezide misa agradesimentu iha Igreja Katedrál Santu António Baucau.
Lee Mós : Dom Leandro Maria Alves Hakarak Sai Símbolu Unidade no Sinodalidade

Bispu foun Dioseze Baucau, Dom Leandro Maria Alves, akompaña hosi Dom Virgílio Kardeál do Carmo da Silva, SDB ho Bispu Norberto Amaral fó bensaun bá sarani sira ne’ebé partisipa misa ordenasaun episkopál Dom Leandro Maria Alves nian iha Igreja Katedrál Santu António Baucau, Sesta (21/07/2023). Foto/Elio dos Santos da Costa

Misa agradesimentu ne’ebé akompaña hosi Dom Virgílio Kardeál do  Carmo da Silva, SDB, bispu Arkidioseze Metropolitana Díli ne’e nu’udár selebrasaun misa sagradu dahuluk Dom Leandro Maria Alves nian hafoin simu ordenasaun episkopál, Sesta (21/07/2023).   

Misa agradesimentu ne’ebé partisipa hosi sarani Dioseze Baucau, família rasik hosi Dom Leandro Maria Alves, membru órgaun soberanu sira no konvidadu sira hosi Dioseze Metropolitana Díli ho Dioseze Maliana ne’e, Dom Leandro Maria Alves iha nia omília halo reflesaun kle’an kona-bá Liturjia ho Evanjellu, ohin  nian.

Tuir mai Hatutan.com sita  kompletu  konteúdu omília Dom Leandro Maria Alves nian;

Leitura sira Domingu ohin, nian ne’e, hatudu mai ita Maromak ida ne’ebé laran luak, Maromak ida ne’ebé lakohi ema sala nain ka pekador sira nia mate, maibé hakarak sira-nia konversaun hodi tama iha Maromak Nia reinu.

Primeira leitura fó hatene momos katak Maromak ne’e kbiit Nain, ukun sasan hotu-hotu, mesmu  nune’e Maromak ne’e nafatin laran kmaus no perdua nain. Perdua nia povu, hanesan iha livru sabedoria hateten, maske ema iha kbiit atu ukun, ita halo justisa ho laran kmaus, ita ukun an ho laran luak.

Dalan atu fila bá Maromak ne’e ida mak sakramentu bá rekonsiliasaun ka sakramentu bá konfisaun, liuhosi konfisaun halo ita sai ema Maromak Nian no halo ema bá hamutuk ho Maromak.

Ema di’ak tuir livru sabedoria mak ema ne’ebé fó diak bá ema seluk, halo belun ho ema hotu, tan fuan moos, la hanoin aat bá maluk sira, la laran moras bá ema, la rai kunan bá maluk sira maibé haraik an no perdua nain.

La laran moras bainhira ema halo aat bá nia, maibe hateten fó fuan bo’ot atu simu hodi  perdu no hatudu sai Maromak nia an. Ema ne’e hatene haree hahalok di’ak Maromak nian, no hamoris iha nia an rasik ne’e mak sarani diak, sarani ne’ebé moris tuir Maromak nia hanorin.

Dom Leandro Maria Alves fó bensaun ba sarani sira hotu ne’ebé partisipa iha nia misa ordenasaun episkopál nu’udár Bispu Dioseze Baucau, Sesta (21/07/2023). Foto/Elio dos Santos da Costa

Inan-aman sira tenke buka atu hakbesik an bá oan sira, buka atu ko’alia ho oan sira, labele abandona oan sira, tamba bainhira ita abandona oan sira iha halo komunidade mós moris la hakmatek.

Atu komunidade moris hakmatek, família tenke buka atu hadomi oan sira, tau matan bá oan sira, bainhira buat ne’ebé diak bá oan sira, haruka oan sira estuda, ida ne’e mak dehan hadomi oan sira.

Evanjellu ohin nian, ita rona Nai Jesus uza ai-knanoik atu ko’alia kona-bá Maromak Nia reinu, Jesus apresenta ai-knanoik tolu; trigu, mostarda musan no fermentu ne’ebé tau bá farina. Liu hosi ai-knanoik sira ne’e Jesus hanorin ita ema kona-bá prezensa Maromak nian iha ema ida-idak nia an, iha ema ida-idak nia moris.

Jesus uza simblu sira ne’e, iha nia mensajen atu halo ema ida-idak hateke bá nia moris, hateke bá an rasik hodi buka atu fila an bá Nai Maromak.

Jesus hala’o nNia misaun atu salva ka lori ema hotu fila bá Maromak. Jesus hatudu hela dalan no Nia mak dalan ne’e rasik, agora kabe bá ema ida-idak, atu hili moris tuir Maromak katak moris iha hahalok di’ak, perdua malu iha maun-alin sira ka ita hili atu la fó di’ak ho maluk sira, la hatene perdua ka la kohi sai ema domin na’in bá ita nia maluk sira.

Ema ne’ebé mak moris iha domin, ema sei sente hakmatek iha nia sorin-sorin,  ema ne’ebé moris laiha domin sei halo nia sente lahakmatek iha nia sorin-sorin. Se ita la hatene hadomi, la hatene perdua katak ita sai ema aat ne’ebé prepara hela atu tau bá ahi.

Iha ne’e ita bele kompriende katak la’ós Maromak mak kastigu ita, Nia haruka Jesus atu salva ita maibé ita mak lakohi atu moris tuir dalan ne’ebé Nai Maromak husik hela ona mai ita, ne’edunik la’ós Maromak mak la hadomi ita, maibé ita mak ho hakarak rasik husik Maromak, lakohi tuir Maromak Nia hanorin sira, ita mak kastigu ita nia an rasik, la’ós Nai Maromak. Maromak nia hakarak deit mak ema nia moris.

Ita husu bá Maria ita-nia inan, ne’ebé maka hatudu oinsa atu eduka oan sira, Maria hakarak mós ita hotu tau matan bá ita nia oan, labele abandona, São José mós hanesan.

Ita husu atu ho intersesasaun Maria no São José nian. São José ida ne’ebé aman haraik an nian, aman ida  ne’ebé Santu, nonook, maibé servisu atu haree nia família, servisu atu lori nia oan bá integra bá Nai Maromak.

Ita husu Nain Feto Maria no São José akompaña ita-nia família hotu atu sai trigu musan di’ak, atu hamoris pás, hakmatek no hases ema hotu hosi barullu sira, moris perdua malu, hadomi malu no unidade iha moris lorloron nian. ***