Hatutan.com, (23 Jullu 2023), Baucau—Dom Virgílio Kardeál do Carmo da Silva, SDB, Bispu Arkidioseze Metropolitana Díli, hato’o parabéns bá Bispu foun Dioseze Baucau nian, Dom Leandro Maria Alves, ne’ebé simu ona ordenasaun episkopál iha Sesta, 21 fulan-Jullu 2023.

Lee Mós : Omília Dom Leandro Maria Alves iha Misa Agradesimentu

Dom Virgílio Kardeál do Carmo da Silva, SDB. Foto/Elio dos Santos da Costa

Liuhosi diskursu agradesimentu iha misa agradesimentu bá Dom Leandro Maria Alves iha Igreja Katedrál Santu António Baucau, Domingu (23/07/2023), Dom Virgílio Kardeál do Carmo da Silva, SDB hateten, iha loron hirak-ne’e Dom Leandro Maria Alves simu ona ordenasaun episkopál hodi halo Dom Leandro soin duni knar episkopál ninian, sai bispu daruak Dioseze Baucau ninian.

Dom Virgílio Kardeál do Carmo da Silva, konsidera, ohin, mak grasa ho ksolok bá Kreda Timor, liuliu bá Dioseze Baucau durante tempu naruk hein hela bispu foun ida tau-matan bá Igreja Partikulár ida-ne’e.  

“Bainhira Maktoban Dom  Basílio do Nascimento, bispu dahuluk Dioseze Baucau nian fila hikas bá Aman Maromak Nia Kadunan iha loron 30 fulan-Outubru 2021, Dioseze Baucau nia oan sira husu no harohan bá Maromak, hein ho pasiénsia no firmeza atu Maromak haraik bá sira Bispu ida no aman ida bá família boot Dioseze ida-ne’e nian,” Dom Virgílio Kardeál do Carmo da Silva hateten.

Maromak, tenik Dom Virgílio Kardeál do Carmo da Silva, rona sira-nia harohan liuhosi Santu Padre Francisco ne’ebé nomeia Padre Leandro Maria Alves, nu’udár Bispu foun Dioseze Baucau nian.

“Parabéns bá Dom Leandro no parabéns bá Dioseze Baucau,” Dom Virgílio Kardeál do Carmo da Silva hateten ho basa-liman ksolok hosi sarani sira ne’ebé partisipa iha misa agradesimentu ne’e.

Karisimu Dom Leandro Maria Alves, nia prosesu tomak hahú hosi eleisaun bá to’o nomeasaun no ordenasaun episkopál, tuir Dom Virgílio Kardeál do Carmo,  hola parte iha momentu istóriku igreja universal nia moris, tanba igreja iha mundu esperimenta hela daudaun espíritu moris sinodalidade ninian, sinu bá bispu sira-nian, mak momentu kmanek ida igreja lokál no universal   sira ho roman Espíritu Santu nian la’o hamutuk iha dalan ne’ebé hanesan hodi hateke bá diresaun ida de’it iha misaun uma kreda ninian.

Nia hatutan, bainhira iha espíritu sinodalidade ninian  ho espíritu lema episkopál Dom Leandro hili ona, “La’o Lemorai Hodi Halo Di’ak” lori ita bá haree hetan pontu enkontru ida ne’ebé bele sai itineráriu programatíku  bá atividade pastoral no governasaun ecclesial iha Dom Leandro nia knaar nu’udár Bispu Dioseze Baucau nian.

Dom Leandro Maria Alves simu ordenasaun hosi Arsebispu Metropolitana Díli, Dom Virgílio Kardeál do Carmo da Silva, SDB iha Igreja Katedrál Santu António Baucau, Sesta (21/07/2023). Foto/Elio dos Santos da Costa

“Ita liga espíritu rua ne’e sai ida de’it, katka Igreja la’o hamutuk iha dalan ne’ebé hanesan. La’o hamutuk atu halo di’ak, itineráriu sei hatudu duni sizanómia loloos  igreja ida ne’ebé hatene la’o loloos entre bispu no ho nia prezbíteru sira. Hamutuk ho kolaborasaun hosi ajente pastoral sira no sarani hotu la’o hamutuk hodi  halo di’ak bá kreda nia moris no nia santidade,” Dom Virgílio Kardeál do Carmo tenik.

Itineráriu dalan ida ne’e, tuir Dom Virgílio, Aman Maromak perkore ona iha istória salvasaun nian hafoin ho mistériu enkarnasaun Jesus  Kristu rasik mai moris no la’o hamutuk ho ema iha dalan ema nian no liu tiha esperiénsia Páskua nian Jesus haruka Nia eskolante sira atu brani tuir modelu moris mestre nian no haruka sira atu la’o iha dalan dixípulu ida-nian la’o hamutuk ho Jesus Kristu.

Nia hatutan, Dom Leandro Maria Alves nia knar ida-ne’e la’o hamutuk ho Kristu iha knar Pastor nian no iha dalan santidade ninian, aprende hosi apóstolu sira-nia jelu pastoral  misionáriu, hateke bá moris fidelidade Santu no Santa sira-nian, aprende hosi responsabilidade paternu São José ninian no sensibilidade materna Na’i Feto nian bainhira tau-matan bá Dioseze ida-ne’e.

La’o hamutuk ho kreda universal no kreda lokál, Dom Virgílio tenik, kooperasaun episkopál nia objetivu mak atu bispu sira moris iha espíritu apoiu resiplu ka tulun malu iha knar episkopál no atu bele iha inisiativa pastoral hosi bibi-atan ida-idak bá nia dioseze no mós bá sarani sira tomak iha territóriu ida, bele nasaun ka kontinente ida.

Bá Dom Leandro, nia dehan, tulun boot ida mak Konferénsia Episkopál ne’ebé sei la’o hamutuk ho ita-boot iha knar foun no sagradu ida-ne’e. la’o hamutuk ho prezbíteru sira hotu  ne’ebé pertense bá Dioseze Baucau  atuálmente Dioseze Baucau iha amu-lulik Diosezanu hamutu 44, diákonu rua (2), la sura ho relijiozu sira ne’ebé hala’o misaun ida dioseze ida-ne’e.

Nia afirma, bispu foun sei kolabora ho amu-lulik sira hotu, diosezanu ho relijiozu, atu bele hatán bá nesesidade pastoral  no asisténsia sakramentu bá sarani sira, unidade, fraternidade, no kolejialidade tenke sai duni istilu moris bá Dioseze Baucau nian.

Alende, amu-lulik sira kolaboradór hosi Bispu ninian, tuir Dom Virgílio, iha mós relijiozu sira, katekista sira, ministru estraordináriu sira, leigu komprometidu sira, sei hola parte ativamente nu’udár ajente pastoral ne’ebé sei tulun bispu iha nia servisu pastoral ninian.

Dom Virgílio Kardeál do Carmo da Silva nia lia-menon murak bá dioseze Baucau oan sira hotu, “bispu diosezanu ohin iha ona imi leet, tanba imi, bá imi, ho imi. Tan ne’e, imi hotu buka bá atu la’o ho nia, hadomi nia, kuidadu nia, kolabora no tulun nia iha nia knar tau matan bá dioseze ida-ne’e. Hanesan família halo ho tinan 50, nune’e mós dioseze halo nu’udár amu-lulik iha tinan 18,no ohin ami entrega bá iha dioseze Baucau atu la’o hamutuk ho ita-boot sira. Kuida nia bá to’o rohan.

Hamutuk ho São José, aman no mahein dioseze Baucau nian, liuhosi harohan da’et, tenik Dom Virgílio, sei akompaña  Dom Leandro iha nia knar nu’udár bispu dioseze Baucau nian, hakonu nia ho fuan aman nian hodi tau-matan bá dioseze ida-ne’e  iha territóriu ida ne’ebé nakonu ho fatuk no rai-mean, maibé nia emar sira mesak fuan osan-mean. Ne’e duni, Dom Leandro, la’o bá hasoru sira, koñese sira, hadomi sira no  halo di’ak.

Jornalista : Francisco Belo Simões