Hatutan.com, (28 Marsu 2022), Díli– Partidu  FRETILIN liuhusi Komisaun Polítika Nasional (CPN, sigla portugés) iha loron 26 fulan-Marsu ne’e, hasai akta deliberasaun Nú. 02/CPN/2022 hodi fó rekoñesimentu militansia ba Tenente Jenerál reformadu Lere Anan Timur nudár militante FRETILIN segunda jerasaun  membru Komité Sentral FRETILIN (CCF) ne’ebé eleze husi  konferénsia Maubai 1981.

Notísia iha Relasaun: Simu Taur Matan Ruak iha Rezidénsia, Lere Laiha Tempu Hasoru Alkatiri

Jenerál Reformadu Lere Anan Timur. Foto/Hatutan.com

Sekretariu jerál Partidu FRETILIN Mari Alkatiri, nudár prezidente CPN-FRETILIN liuhusi deliberasaun ne’ebé Hatutan.com, asesu, Segunda (28/03/2022),  mensiona katak saúda ho desizaun kamarada Lere Anan Timur nian ne’ebé ho onra nafatin respeita ba relasaun istóriku ne’ebé vínkulu no permanese ho FRETILIN, no nia deklara fila-fila ba públiku dezde sei asume kargu hanesan superiór iha FALINTIL-Forsa Defeza Timor Leste (FDTL).

Liuhusi deliberasaun ne’e, Mari Alkatiri reafirma hodi rekoñese Lere Anan Timur nia kualidade hanesan úniku membru sobrevivente FRETILIN segunda jerasaun ne’ebé sei moris.

Advertisement

“Sei atribui mós sertifikadu rekoñesimentu nudár ex-membru CCF ne’ebé eleitu iha konferénsia nasionál FRETILIN iha loron 1 to’o loron 3 fulan-Marsu 1981 no fó kartaun membru ativu,” sita karta deliberasaun ne’ebé Hatutan.com asesu.

Akta deliberasaun Nú. 02/CPN/2022 husi CPN-FRETILIN hodi fó rekoñesimentu militansia ba Tenente Jenerál reformadu Lere Anan Timur nudár militante FRETILIN segunda jerasaun husi konferénsia Maubai 1981.

Iha momentu hanesan, rekoñese no konvida Lere Anan Timur atu partisipa iha reuniaun komisaun polítika nasionál no  CCF, atu bele kontribui no reforsa FRETILIN no ida-ne’e útil ba aprofundamentu debate asuntu estratéjiku sira ba interese partidu no mós nasionál.

Iha loron hanesan CCF liu husi CPN hasai mós deliberasaun Nú. 01/CPN/2022, ne’ebé ho objetivu atu unifika hikas forsa, militante kuadru sira no lideransa partidu FRETILIN nian hodi apoiu unika kandidatu husi FRETILIN,  Francisco Guterres “Lú Olo” iha eleisaun prezidensiál ba segunda volta no reforsa plataforma entendimentu entre partidu polítiku tolu; FRETILIN, PLP no KHUNTO.

Haluan baze apoiu kandidatu Lú Olo nian ho karakter transversal no partisipativa ho  kamada polítiku hotu husi partidu polítika tomak, brigade, ativista, profesionál sira, organizasaun sosiál no naun governmental hotu, organizasaun feto no juventude, jerasaun patriota, organizasaun afiliada sira  partidu FRETILIN no sei adopta format servisu ne’ebé atu fó priviléjiu hamutuk ho povu  no komunidade sira.

Jornalista: Vito Salvador

Advertisement