Hatutan.com, (29 Marsu 2022), Dili-Kandidatu Prezidente Repúblika ho númeru sorteiu 8, Tenente Jenerál (reformadu),  Tito da Costa Cristovão “Lere Anan Timur”,  seidauk  bele foti desizaun atu apoiu Kandidatu PR, José Manuel Ramos-Horta ka Francisco Guterres “Lú Olo” iha eleisaun prezidensiál  segunda volta mai ne’e.

Notísia iha Relasaun: CPN-FRETILIN Rekoñese Lere Úniku Sobrevivente Segundu Jerasaun CCF

Lere Anan Timur. Foto/Hatutan.com

Liu husi konferénsia imprensa ne’ebé hala’o iha nia rezidénsia, Dili, Tersa (29/03/2022), Lere Anan Timur ne’ebé akompaña husi nia ekipa susesu sira deklara katak servisu ne’ebé importante ba nia atu kontribui maka problema asuntu nasionál nian.

Sobrevivente segundu jerasaun Komité Sentrál FRETILIN  (CCF, sigla portugés) úniku ne’e reafirma katak to’o agora nia sei kolen hela no presiza deskansa tanba liu semana rua, 02-16 Marsu 2022, nia mesak hala’o kampaña ba nia kandidatura Prezidente Repúblika 2022-2027 nian hale’u territóriu nasionál.   

“Sábadu liubá, ha’u hasoru Sekretáriu Jerál partidu FRETILIN maun Mari Alkatiri ho Prezidente FRETILIN, Maun Lú Olo. Iha hasoru-malu ne’e, Maun Lú Olo fó hatene ba ha’u atu ba hamriik iha palku ho sira nian tolu; Mari Alkatiri, Taur Matan Ruak ho Lú Olo iha kampaña prezidensiál segunda volta nian.  Ha’u dehan ha’u seidauk deside; primeiru ha’u kolen tanba semana rua nia laran ha’u lao mesak, ema ida la apoia ha’u,” Lere Anan Timur hateten hodi hatán pergunta jornalista sira-nian.

Kona-bá Lere Anan Timur atu fila ba FRETILIN tuir deliberasaun akta husi Komisaun Polítika Nasional (CPN, sigla portugés) FRETILIN nian ne’ebé  asina husi prezidente CPN-FRETILIN, Mari Alkatiri,   iha loron 26 fulan-Marsu 2022, Lere Anan Timur lia tun dehan, iha nia kandidatura ne’e hetan apoiu husi ema oioin no husi partidu oioin, inklui militante FRETILIN sira barak. Tanba ne’e, situasaun sira ne’e Lere kompromete sei tetu ho didi’ak no ho kalma atu oinsá mak deside iha tempu badak nia laran.

“Atu fila, ha’u hanoin katak ha’u-nia apoiante la’ós mai hosi partidu ida, ne’ebé ha’u ba mós  ha’u sei lori sira hotu la’ós lori sira na’in-10 liu nudár militante FRETILIN de’it,” Lere tenik tan.

Lere Anan Timur mós promete iha tempu fulan ida nia laran molok kampaña eleisaun ba Prezidente Repúblika segunda volta, nia sei anunsia ba públiku nia atu apoia kandidatu ida ne’ebé alias entre Francisco Guterres “Lú Olo” ka José Manuel Ramos-Horta.

“Ita depende ba públiku no la bele depende ba ha’u. Ha’u nia apoiante sira mak depende ba ha’u  nune’e ha’u sei sukat no ha’u sei dasi,” Lere hateten.

Iha konferénsia imprensa ne’e, Lere konfirma mós katak nia parte hasoru malu ona ho nia maluk sira husi Frente Armada nian, hanesan Lú Olo ho Taur Matan Ruak, inklui Xanana Gusmão.

“Maun Ramos-Horta mós husu atu mai hasoru ha’u. Maibé, ha’u dehan, nia diplomata senior ida, tanba ne’e ha’u mak sei ba hasoru nia, hanesan mós ho maun Mari Alkatiri, ha’u mak ba hasoru nia iha nia Gabinete ei Titular iha Farol, Dili,” Lere hateten.

“Ha’u nia maun boot Xanana ho ha’u nia maun-alin sira ne’ebé mai husi ai-laran sira koñese ha’u. Ha’u hasoru ha’u nia maun boot, nia hateten mai ha’u nune’e n jenerál Lere hanoin didi’ak, ne’e hanesan fó konsellu ha’u ba ha’u,” Lere hatutan.

“Ba maun Mari ho Maun Ramos-Horta, ha’u rasik mak ba sira ida-idak nia uma. Ami ko’alia sira ho di’ak no ha’u seidauk tomak pozisaun. Tanba hosi sorin maun Mari, maun Lú Olo ho Maun Taur Matan Ruak hamutuk no husi sorin maun Xanana ho maun Ramos-Horta hamutuk. Ha’u seidauk toma desizaun ida.”  

Jornalista: Rogério Cárceres