Hatutan.com, (03 Marsu 2022), Dili-Kandidatu Prezidente Repúblika 2022-2027, Tenente Jenerál Reformadu, Tito da Costa Cristovão alias Lere Anan Timur ho nia espoza, Kinta loraik (03/03/2022), hasoru-malu ho José Ramos Horta no prezidente partidu CNRT, Kay Rala Xanana Gusmão iha abitante ida nia uma iha Larigutu, Ossú, Munisípiu Viqueque.

Jenerál Reformadu, Lere Anan Timur ho nia espoza hasoru-malu ho Xanana Gusmão no Ramos Horta iha Larigutu, Ossú, Viqueque, 03 Marsu 2022. Foto/Espesiál

Bainhira Jenerál reformadu ne’e ho nia ekipa no delegasaun atu haku’ur liumai Munisípiu Baucau atu kontinua halo kampaña ba loron datoluk nian, Sesta (04/03/2022), Lere Anan Timur hateke kona Xanana Gusmão ho Ramos Horta tuur deskansa hela iha abitante  ida nia varanda. Nune’e, Lere kandidatu PR ho númeru sorteiu 8 ne’e akompaña husi nia espoza tuun husi karreta hakat ba to’o Xanana ho Ramos Horta hodi kumprimenta no kaer-liman ho amizade tebetebes.

“Ha’u foin iha Viqueque no agora ami atu liubá Baucau. Agora maun-sira kontinua ba fali Viqueque. Ita sees-malu de’it. Viva CNRT, viva PLP no viva FRETILIN,”   hateten Lere Anan Timur ho oin kontente bainhira kaer-liman ho nia Komandante ein-Xefe FALINTIL, Kay Rala Xanana Gusmão no Ramos Horta, ne’ebé nudár mós kandidatu PR 2022-2027.

Sorumutuk iha minutu balun nia laran ne’e, lori ksolok boot ba apoiante no ekipa susesu sira husi parte rua; Ramos Horta ho Lere Anan Timur, no sira mós akompaña ho basa-liman no hakilar, “Viva maun-boot Xanana, viva maun Lere no viva maun Ramos Horta”.

Promete ba Viqueque Oan atu Dignifika Povu

Iha komísiu polítiku kandidatu Prezidente Repúblika, Jenerál reformadu Tito da Costa Critovão alias Lere Anan Timur,  promete ba Viqueque oan sira, katak nia sei dignifika povu nia moris tuir misaun no vizaun ne’ebé iha atu ema hotu moris ho dignu no iha prosperidade.

Militante FRETILIN iha baze Uatulari, Viqueque, espresa sira-nia domin no fó rekoñesimentu ba Jenerál reformadu Lere Anan Timur liuhusi entrega kamiza Membru Comite Central 2⁰ Jerasaun nian iha Uatulari, 24 Fevereiru 2022. Foto/Espesiál

Liuhusi kampaña aberta iha Kampu Futeból Viqueque, segundu jerasaun FRETILIN nian ne’e afirma katak, bainhira povu fó fiar asume responsabilidade nudár xefe estadu ba periodu 2022-2027, sei hakuak ema hotu no afavór ba povu nia moris di’ak hodi garante ema hotu moris ho dignu tuir prinsípiu ukun rasik an

Lere hateten ba militante no simpatizante hotu husi partidu oin-oin ne’ebé halibur hamutuk iha Viqueque iha ámbitu kampaña refere katak sira hotu ne’ebé halibur malu iha Kampu Futeból Viqueque  ne’e mai husi hun ida, abut ida no uma ida, maka FRETELIN nune’e nia parte husu atu se de’it mak apoiu nia kandidatura keta ta’uk ho intimidasaun no ameasa ne’ebé individu ka oknum balun halo, maibé tenke firme no hamutuk dignifika povu no defende povu.

“Ha’u mai husu imi atu fó imi nia domin mai ha’u tamba ha’u hakarak justisa, unidade, estabilidade no dezenvolvimentu ba povu maubere no nasaun ida-ne’e,” Lere Anan Timur hateten.

Lere promete nia la halo promesa falsu ba inan-aman sira ho kompromisu oin-oin, maibé mós sei la afavór ba orsamentu estadu ne’ebé la valoriza veteranu no eroi sira, liuliu la dignifika povu nia moris.

“Kuandu orsamentu estadu la tau prioridade ba povu nia moris hanesan prezidente repúblika ha’u sei veta,” Lere afirma.

 “Iha Viqueque, ha’u la mesak kandidata an ba prezidente repúblika maibé hamutuk ho saudozu Daitula no saudozu sira seluk tan,”  Lere tenik.

Iha kampaña aberta Tenente Jenerál Reformadu  nian ne’e hetan partisipasaun másimu husi militante no simpatizante sira partidu FRETILIN  husi postu administrativu lima (5), hanesan Lacluta, Uatulari, Uatucarbau, Ossú no Viqueque vila.

Antes ne’e Tenente Jeneral Reformadu Lere Anan Timur halo ona kampaña dahuluk iha Munisípiu Manatutu no nia rasik hateten hetan bensaun husi Kay Olo no Kay Rala nune’e garante vitória iha Munisípiu Manatuto.

Kampaña aberta kandidatu PR Lere Anan Timur  ho lema “Marka Diferensa” iha Munisípiu Manatuto ho Viqueque halibur ema lubun no sempre hafutar ho bandeira FRETILIN.

Tuir oráriu husi Komisaun Nasional Eleisaun (CNE) katak Tenente Jenerál reformadu ne’e sei kontinua halo kampaña aberta iha Munisípiu Baucau.

Jornalista: Vito Salvador