Hatutan.com, (29 Marsu 2022), Díli—Ministériu Administrasaun Estatál (MAE), distribui fasilidade eletrónika ba Xefe Suku 452 iha territóriu Timor-Leste ne’ebé kada suku hetan Komputadór unidade ida, printer ida no UPS ida.

Serimónia distribuisaun fasilidade eletronika ba Xefe Suku hamutuk 52 hosi Munisípiu Ermera iha Gleno, 28 Marsu 2022. Foto/MAE.

Distribuisaun ne’e hahú hosi Munisipiu Ermera no sei kontinua ba Munisipiu sira seluk, inklui Rejiaun Administrativa Espesiál Oecusse Ambeno (RAEOA) no Ataúro.

Notisia iha Relasaun:KM Aprova Subsídiu ba Xefe Suku Sira $250, Xefe Aldeia $150

Tuir planu, distribuisaun tuir mai sei realiza iha munisipiu Baucau, Dili no munisipiu sira seluk ne’ebé previstu atu konklui iha fulan Abril 2022.

Ministru MAE, Miguel Pereira de Carvalho, ofisialmente oferese ba Xefes uku sira iha Gleno iha 28 Marsu 2022, hateten VIII Governu komprometidu hodi hadi’a funsionamentu administrasaun suku iha territóriu Timor-Leste nune’e bele fasilita suku sira kolabora ho órgaun no servisu Administrasaun Públika nian hodi tau-matan ba interesse públiku no komunidade.

“Obrigasaun no devér Governu nian maka fasilita suku sira ho meius no rekursu adekuadu nune’e bele ezerse sira nia funsaun tuir Lei Suku númeru 9/2016, nune’e bele tau-matan ba vida povu nian,” Hatutan.com sita komunikadu.

Fasilidade eletronika ba Xefe Suku sira. Foto/MAE.

Tanba ne’e, nia apela ba Xefes uku sira ho membru Konsellu Suku hotu atu kolabora ho adminitrasaun lokál Estadu no administrasaun sentrál hodi tau-matan ba interesse públiku no komunidade iha sukus sira.

MAE halo esforsu hotu-hotu hodi hadi’a funsionamentu administrasaun suku sira hanesan reabilita ona sede suku 400 no sede suku 52 sei rehabilita iha tinan 2023, hasae insentivu xefe suku no membru konsellu suku sira.

MAE mós lansa ona plataforma informátika Sistema Integradu Jestaun Administrasaun Suku (SIGAS) ne’ebé nia objetivu hodi rejista Livru Suku sira iha forma eletrónika no online.

Iha distribuisaun fasilidade eletronika ne’e Xefe Suku hamutuk 52 hosi Munisípiu Ermera mak hetan uluk fasilidade hirak ne’e.

Jornalista: Rogério Pereira Cárceres