Hatutan.com, (05 Abríl 2022), Dili-Durante kampaña eleisaun prezidensiál primeira volta to’o segunda volta, iha semana daruak ikus ne’e, deputadu barak mak auzénsia  iha plenária Parlamentu Nasionál (PN) hodi impede tiha debate, votasaun no aprova ba projetu lei ne’ebé tau ona iha ajenda diskusaun.

Plenaria Parlamentu Nasionál. Foto/Hatutan.com

Primeira Vise- Prezidente Parlamentu Nasionál (PPN), Maria Angelina Sarmento, hateten, iha eleisaun prezidensiál primeira volta no oras ne’e tama fali iha segunda volta, deputadu sira hala’o nafatin kna’ar hanesan reprezentante povu iha plenária PN hodi halo deliberasaun ba projetu lei ruma, polítika, ka rezolusaun ruma.

Maske iha mós difikuldade balu kona-bá atu prienxe kuorum hodi halo deliberasaun ba rezolusaun ruma ka polítika ruma, maibé deputadu sira mai nafatin, atu hatudu katak, responsabilidade ida deputadu nian, no ba Estadu ho povu ida ne’e, la hetan impedimentu ruma, tanba de’it eleisaun, ka tanba de’it kampaña eleitorál.

“Ita boot sira haree, ami deputadu bankada Governu, sempre hala’o ami nia responsabilidade hodi prienxe kuorum. Mas  koinsidénsia, iha deputadu na’in-rua hosi ami PLP nia bankada, ida mak ba hala’o tratamentu saúde, no deputadu Marçal maka nia kondisaun saúde ladún permite. Maibé, nia mós halo duni servisu balu  fó apoiu ba prosesu kampaña nian, entaun nia la mai diretamente iha ne’e, no deputadu ida tán hosi bankada FRETILIN nian, entaun hamutuk deputadu na’in-tolu,” Primeira Vise Prezidente Parlamentu Nasionál (PPN), Maria Angelina Sarmento hateten ba Hatutan.com iha PN, Tersa (05/04/2022).

Maria Angelina Sarmento konsidera, situasaun ida-ne’e la sai hanesan problema boot ida ba sira, tanba númeru deputadu ne’ebé falta ne’e, la’ós ho númeru ne’ebé boot, hanesan hosi 10 to’o 15.

“Deputadu na’in-rua ka tolu de’it, ne’ebé halo duni defisiénsia ka iha kuorum atu halo deliberasaun ruma,” Maria Angelina Sarmento hateten.

Biar nune’e, deputada Angelina afirma, sira-nia responsabilidade no dedikasaun hanesan reprezentante povu ne’ebé povu hili ona, sei kontinua hala’o kna’ar no to’o iha loron  05 fulan-Abríl  ne’e, konsege to’o iha ajenda ida kona-bá deliberasaun ba rezolusaun projetu lei rua. Maibé, projetu lei ida mak sira la konsege halo votasaun, tanba deputadu sira la prienxe kuorum. No tuir regra, atu halo deliberasaun ba projetu lei ruma, másimu tenke prezensa hosi deputadu na’in-33.

Deputada husi PLP ne’e, husu ba konsiénsia hosi deputadu sira bankada seluk nian, atu enkoraja-an katak, buat ne’ebé nia halo ne’e, loos ka lae. Tanba politikamente, deputadu balu bele sente loos. Maibé, dala-ruma ladún di’ak ba nia konsiénsia.

“Entaun, ha’u hanoin, problema ne’e la’ós ita ko’alia kona-bá lei ne’ebé mak tenke kesi ema, maibé ita-nia konsiénsia mak importante liu,” deputada Maria Angelina Sarmento hateten.

Falta, Presiza iha Justifikasaun

Tuir rejimentu Parlamentu Nasionál nian, deputadu sira ne’ebé mak falta iha loron plenária, ne’ebé mak tuir loloos tenke marka prezensa, deputadu sira tenke halo justifikasaun pur-eskrita, kona-bá sira-nia falta ka impedimentu hodi la tuir plenária ne’e, razaun tanba saida.

Ho karta justifikasaun hosi deputadu sira-nian ne’ebé husu atu iha lisensa ne’e, karta ne’e sei halo leitura abertamente iha sala plenária, atu nune’e deputadu sira hotu bele rona, katak, durante tempu ka oráriu hanesan ne’e, deputadu ida ne’e, sei la partisipa iha reuniaun plenária, no reuniaun komisaun sira, ho razaun rasik.

“Durante ne’e halo, ita boot sira akompaña, iha períodu antes da orden do dia, ne’ebé ko’alia kona-bá justifikasaun das falta ba deputadu sira. Balu falta, tanba razaun reuniaun ajenda polítika, balu falta tanba razaun moras, balu tanba razaun lia iha família, ida ne’e normál. Ita servisu iha organizasaun sira fora  sistema Estadu nian mós, buat ida falta, ka lisensa tanba moras, ka buat seluk, ne’e normál,” deputada Maria Angelina Sarmento hateten tán.

Jornalista: Rogério Pereira Cárceres