Hatutan.com, (19 Setembru 2023), Díli-Parlamentu Nasionál (PN) liuhosi Komisaun E trata asuntu Infra-estruturas ho Komisaun G ne’ebé trata asuntu Edukasaun, Juventude, Kultura no Sidadánia, sei halo fiskalizasaun bá ró ne’ebé sosa hosi  Ministériu Edukasaun, Juventude no Desportu (MEJD) ho kustu purvolta $142,000.

Lee Mós: MEJD Sosa Ró Folin $142,000 bá ESTV Peska Atauro La Utíl To’o Ferrujen

Ró ne’ebé MEJD sosa bá ESTV Peska Atauro iha 2016, maibé aat tiha iha 2017 too agora. Foto/Elio dos Santos da Costa

Iha tinan 2016 Ministériu Edukasaun Juventude no Desportu (MEJD) sosa ró refere bá Eskola Tékniku Vokasionál (ESTV)  Peska Atauro. Maibé, ró  ne’e la util bá estudante sira halo sira-nia atividade tanba foin uza dala rua de’it iha tinan 2017 aat to’o ohin loron no bersik ferrujen ona iha tasi-laran iha área Lecidere, Díli.

Prezidente Komisaun E, Marcos Xavier hateten, Komisaun E seidauk hatene no laiha duni koñesimentu kona-bá ró ne’ebé MEJD  sosa, sá tán dehan ró ne’e paradu de’it.

“Mais, bá edukasaun, ha’u la hatene, sira sosa ró hira? Ha’u mós la hatene. Ha’u laiha dokumentu ida para atu ha’u lee netik, dehan lae, MEJD sosa ona ró ida hanesan ne’e, ho folin hanesan ne’e. Mais, ha’u la hatene,” Deputadu Marcos Xavier hateten  hodi responde Hatutan.com iha Parlamentu Nasionál (PN), Tersa (19/09/2023).

Hatán kona-bá ró sosa ho orsamentu Estadu no la utíl hodi lori prejuízu bá Estadu , Deputadu Marcos Xavier dehan, ne’e loos duni, maibé, nia la hatene duni prosesu sira kona-bá ró ne’e, no tanba sá mak ró ne’e avaria de’it.

Prezidente Komisaun E ne’ebé mai hosi bankada Governu nian  Cogresso Nasionál Reconstrucção Timorense (CNRT) ne’e, sujere bá Hatutan.com atu konfirma de’it asuntu ne’e ho Komisaun G, trata asuntu Edukasaun nian, tanba tuir nia Komisaun G bele fó informasaun klaru liu.

“Sé ita-boot sira husu fali mai ha’u, Komisaun E, agora, ne’e la’ós tutela iha ha’u nia komisaun Ne’ebé, husu buat ne’ebé mak ha’u hatene, ha’u bele responde bá alin sira. Ida ne’ebé la hatene, ha’u labele hatete,” Marcos Xavier tenik.

Prezidente Komisaun E ne’e promete atu buka tuir prosesu sira kona-bá sosa ró ne’e, no tanba sá mak ró ne’e labele hala’o ninia operasaun.

Komisaun G Mós Sei Buka Hatene

Prezidente Komisaun G, Armando dos Santos Lopes, hateten  maske hanesan deputadu ne’ebé foun iha PN no lideransa foun ida mós iha Komisaun G, maibé nia parte haree katak, asuntu kona-bá ró ne’e halo parte bá kna’ar no responsábilidade Komisaun G nian. Tán ne’e sei halo fiskalizasaun bá ró ne’e hodi haree direta nia kondisaun sira no buka hatene mós nia prosesu sira bá sosa ró ne’e.

“Ida-ne’e mak ha’u hanoin katak, depois  ami halo fiskalizasaun bá ró  nia kondisaun ida molok  ami evanta atu kontinua halo investigasaun bá ida ne’e, tanba ne’e orsamentu jerál estadu nian,” Deputadu Armando dos Santos Lopes hateten.

Deputadu Armando esplika iha fiskalizasaun ne’e, primeiru, sira sei haree uluk ró ne’e ninia kondisaun sira, saida mak aat, tanba sá mak buat ne’e akontese, no tán sá mak to’o agora mós seidauk rezolve.

“Sé presiza manutensaun, ami tenke halo proposta para halo manutensaun. Sé ida ne’e liu ona, entaun, ami tenke buka solusaun buat seluk,” Armando Lopes hateten.

Hatán kona-bá presiza sosa foun tán ró seluk ka lae, deputadu hosi bankada Partidu Demokrátiku (PD) ne’e dehan, objetivu atu sosa ró ne’e, tanba atu sustenta alunu Eskola Sekundária Téknika Vokasionál (ESTV) sira ninian atividade sira prátika nian. Mais, derepente, operasaun fulan ida ka rua de’it mak ró aat ona, agora tenke buka, tán sá mak ró ne’e aat, ida ne’e mak importante.

Prezidente Komisaun G ne’e promete sei kontinua konsulta ho Ministra Edukasaun foun, Dulce de Jesus,  atu haree asuntu ne’e didi’ak tanba ne’e direitu alunu sira ESTV Peska Atauro sira-nian.

“Ne’e, automátikamente, tanba ami reprezenta povu iha uma-fukun ida ne’e. Buat ne’ebé relasaun bá preukupasaun povu nian, ami tenke buka, ami tenke halo fiskalizasaun, ami tenke halo prosesu. Mais, desizaun maka ne’e, katak, Tribunál mak tenke hola desizaun, kuandu ida ne’e tama ona nível kriminál,” Deputadu Armando dos Santos Lopes hateten tán.

Jornalista: Rogério Pereira Cárceres