Hatutan.com, (06 Abríl 2022), Díli– Komisaun Anti-Korrupsaun (CAC, sigla portugés) kontinua halo investigasaun hodi rona sasin sira iha O-écusse ba kazu krime abuzu poder  no partisipasaun ekonomia iha negósiu.

Notísia iha Relasaun: CAC Halo Buska Apreensaun ba Emprezáriu no Adjuntu Prezidente Autoridade RAEOA

Ekipa Investigadór  CAC tutelár ba operasaun, ezekuta mandadu buska no apreensaun Tribunál Distritál Oé-Cusse, Kinta (20/01) ofisialmente entrega objetu apreensaun ne’ebé hala’o iha Tersa (18/01), ba prokuradór tutelár liu hosi ofisiál justisa iha edifísiu Prokuradór Distritál Oé-Cusse, Pante Makassar. Foto/CAC.

Kazu ne’e deskonfia involve emprezáriu na’in-ida hanesan mós sobriñu hosi suspeitu nudár Jerente Seniór RAEOA/ZEESM ka Adjuntu Prezidente Autoridade RAEOA ho inisiál MN ho ninia espoza (co-autór ne’ebé posibilidade bele sai suspeitu).

Daudaun ne’e ekipa CAC iha ona Oé-Cusse hodi kontinua halo investigasaun hodi rona sasin no posibilidade konstitui kedas se maka sai arguidu iha kazu ne’e.

Advertisement

“Objetu sira sei iha CAC nia liman, tanba daudaun sei iha hela faze ezame ba objetu aprendidu, ho nune’e, ita hein prosesu investigasaun ho durasaun tempu loron-10, tanba planu investigadór nian bainhira konklui ona ezame hodi kompleta sasin sira maka konstitui kedas arguidu,” Diretór Jerál Investigasaun CAC, José Verdial  ba jornalista sira iha ninia knar fatin Farol-Dili, Kuarta (06/04/2022).

Bainhira investigasaun remata, CAC sei remesa rezultadu ne’e ba MP hodi haree no halo akuzasaun, tanba ne’e bainhira provas sufisiente atu halo akuzasaun maka sei konklui kedas, maibé bainhira provas seidauk sufisiente maka sei delega fali ba CAC hodi kontinua investiga.

Antes ne’e iha loron 18 fulan-Janeiru 2022, Ekipa Investigadór CAC nian lidera hosi Diretór Investigasaun Kriminál (UIK), Emílio Quintas, akompaña hosi Polísia Nasionál Servisu Investigasaun Kriminál (PNSIK) ezekuta no asegura mandadu Tribunál Rejiaun Administrativa Espesiál Oé-Cusse Ambeno (RAEOA) ho númeru NUC 0057/21.PDOEC loron 17/12/2021.

Mandadu ne’e hasai husi juis Yudi Pamungkas  fó podér ba investigadór CAC hodi halo operasaun buska no apreensaun ba suspeitu diretór emprezáriu na’in-ida (1) hanesan mós sobriñu hosi suspeitu seluk nudár Jerente Seniór RAEOA/ZEESM ka Adjuntu Prezidente Autoridade ho inisiál MN ho ninia espoza (co-autór ne’ebé posibilidade bele sai suspeitu), tanba deskonfia envolve iha kazu krime korrupsaun.

Advertisement

Mandadu ba buska iha domisiliáriu no prende sasán ne’e, juis haruka no fó orden atu halo buska iha domisiliáriu ho posibilidade ba prende sasán ne’ebé mak iha ligasaun ho faktu hirak ne’ebé investiga ona, tuir dispozisaun iha art 37 no nú 2, hosi KRTL, iha artigu 226 no 1, al. c) artigu 108 no 1 artigu 170, hotu-hotu hosi KPP ba suspeitu ninian hela fatin.

Ba kumprimentu efetivu ba mandadu ida-ne’e, iha autorizasaun ba asesu iha dependénsia hotu-hotu, inklui kofre, fatin hirak rai sasán nian, veíkulu hirak ne’ebé uza hosi suspeitu, bele fera odamatan, hakat sai hosi moru no neutraliza animál sira, se presija duni, ho observánsia ba dispozisaun iha artigu 169 no 170 hosi KPPTL. 

Iha operasaun buska domisiliáriu no apreensaun ne’e, investigadór CAC halibur dokumentu lubun boot; konta bankária, osan cash ho montante boot, dokumentu kompañia nian, telefone no dokumentu sobre projetu eletrifikasaun, no projetu balun iha RAEOA/ZEEMS ne’ebé suspeitu ho ninian espoza nian kompañia manán nu’udár evidénsia no objetivu krime. 

Kazu ne’e rasik hetan delegasaun kompeténsia hosi Prokuradór Distritál Oé-Cusse hodi fó delegasaun ba investigadór CAC tuir podér lei hodi halo prosesu investigasaun ho kuidadozu hanesan rona sasin sira, halibur dokumentu no halo survelénsia ba iha intervenenti prosesuál liu-liu arguidu nian bens sira.

Jornalista: Carmelita Isaac

Advertisement