Hatutan.com (06 Abríl 2022), Díli– Komisaun Anti-Korrupsaun (CAC, sigla portugés) bolu ona sasin hamutuk na’in-ualu (8) hodi presta deklarasaun iha CAC kona-bá projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Notísia iha Relasaun: Kazu projetu instalasaun set-top Box/ Prezidente RTTL,E.P presta deklarasaun iha CAC

Set-top Box/ dexodificador RTTL,E.P ne’ebé rai de’it iha Sede Suku Fatuhada, Dili. Foto/Dok.Hatutan.com

Sasin na’in-ualu ne’e, kompostu husi sasin prinsipál na’in-neen (6) ho sasin potensiál na’in-rua (2) hodi fó depoitmentu  ka deklarasaun.

Sasin ne’ebé presta ona deklarasaun iha CAC maioria iha ligasaun ho projetu instalasaun Set top Box/dexodificador RTTL,EP ne’ebé mai husi Ministériu Asuntu Parlamentár no Komunikasaun Sosiál (MAPKOMS) no RTTL,E.P.

“Foin daudauk ami identifika tan sasin poténsia na’in-lima (5) no na’in-rua (2) maka rona ona, maibé sei iha sasin na’in-tolu ne’ebé balun iha Munisípiu, tanba ne’e investigadór sira sei prepara planu hodi dezloka ba Munisípiu hodi rona tan sasin hirak ne’e, maibé atu rona de’it sasin la presiza tempu barak maibé provas husi sasin de’it sei la to’o tanba ne’e CAC mós presiza prova dokumentu ne’ebé depende ba kooperasaun MAPKOMS nian hodi submete lalais dokumentu hirak ne’e nune’e investigadór sira bele analiza,” Diretór Jerál Investigasaun CAC, José Verdial  ba jornalista sira iha ninia knar fatin Farol-Dili, Kuarta (06/04/2022).

Nia esplika iha prosesu investigasaun, iha pergunta inisiál rua ne’ebé investigadór sira oferese ba sasin, maibé depende mós ba resposta husi sasin sira ne’ebé bele aumenta tan pergunta.

Tuir lei prosesu penal halo identifikasaun ba sasin sira iha oras 12 nia laran, maibé enkuantu la hotu, maka sei kontinua fali depende ba sasin idak-idak nia envolvimentu no koñesimentu ba kazu ne’e.

Antes ne’e, iha  Segunda (04/04/2022), Prezidente Konsellu Administrasaun RTTL, E.P, José António Belo, presta ona deklarasaun iha CAC nudár sasin ba kazu refere.

Iha delegasaun kompeténsia husi Ministériu Públiku (MP) ba CAC ne’e ho durasaun loron 45 hodi rona depoimentu husi sasin sira no ikus mai sei submete rezultadu investigasaun ba MP hodi halo analiza no bainhira sei iha falta ruma maka MP sei haruka fali despaxu própriu ho orientasaun klaru ba CAC hodi halo reabertura hodi fó sekuénsia ba orden MP nian.

Ministériu Públiku delega kompeténsia ba CAC hodi hahú arrola sasin sira atu ba presta deklarasaun iha CAC, kona-bá indísiu krime ne’ebé iha relasaun ho projetu  instalasaun Set-top box/dexodificador RTTL,E.P.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nudár Sekretaria iha Gabinete Prezidente FFTL.

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Jornalista: Carmelita Isaac