Hatutan.com (06 Abríl 2022), Díli—Prosesu kontratasaun entre Governu liuhusi Ministériu Transporte no Komunikasaun (MTK) ho empreza  Atralata Estrategi husi Indonézia hodi hatama ró Tranship II substitui ró Belin Nakroma, deskonfia iha indísiu krime partisipasaun ekonomia ba negósiu.  

Notísia iha Relasaun: CAC Kontinua Buka-Tuir Irregularidade Hosi Kazu Ró Tranship II

Ró Transhhip Indonézia. Foto/CAC

Bazeia ba rezultadu investigasaun ka analiza ne’ebé Komisaun Anti-Korrupsaun (CAC) halo ona ba prosesu kontratu  ró Tranship II Gresik Indonézia, hatudu katak prosesu ne’e inkomprimentu ba prosedimentu aprovizionamentu.

Maske iha loron 24 fulan-Juñu 2021, CAC hato’o ona auto partisipasaun rezultadu analiza kona-bá inspesaun ba ró Tranship II Gresik Indonézia, ba Ministériu Públiku (MP), no iha loron 18 fulan-Agostu 2021, CAC submete tan ba daruak auto partisipasaun rezultadu analiza kona-bá inspesaun ba ró Tranship II Gresik Indonézia ba iha MP, maibé to’o agora seidauk iha rezultadu.

“Rezultadu auto notísia ne’ebé CAC halo deskonfia iha indísiu ba krime partisipasaun ekonomia no negósiu tanba iha prosesu ne’e nia faille ne’e tanba inkomprimentu ba prosedimentu aprovizionamentu, signifika jerente autoridade APORTIL maka responsabiliza, tanba prosesu aprovizionamentu la’ós kompañia maka halo,” Diretór Jerál Investigasaun CAC, José Verdial haktuir  ba jornalista sira iha ninia knar fatin, Farol-Dili, Kuarta (06/04/2022).

Notísia iha Relasaun: Autoridade Judisiária Kontinua Prosesa Kazu Ró Tranship II

Tuir kódigu prosesu penal katak na’in ba asaun penal maka Ministériu Públiku (MP), tanba ne’e bainhira CAC submete ona auto partisipasaun rezultadu analiza ba MP maka MP sei halo analiza prova ne’ebé aprezenta sufisiente ona hodi konklui iha akuzasaun ka lae no karik la sufisiente  maka MP sei deside katak MP maka kontinua halo investigasaun ka delega fali ba CAC.

Antes ne’e, Ministru Transporte no Komunikasaun (MTK), José Agostinho da Silva, anunsia ofisiálmente katak, ró KMP Tranship II, hosi  Surabaya, Indonézia hahú substitui ró-ahi Berlin Nakroma no Success, iha loron 25 fulan-Maiu 2021.

MTK halo kontratu ho ró-ahi KMP Tranship II hosi kompañia estranjeiru Atralata Estrategi hosi Indonézia, ho kustu kada fulan $220.000, ne’ebé iha kapasidade tula pasajeiru hamutuk na’in-300, inklui sasán ho tonelada 1.000-resin.

Razaun substituisaun ne’e tanba ró-ahi Berlin Nakroma avaria dezde tinan 2020, to’o agora seidauk hadi’a tanba situasaun COVID-19, no ró-ahi Success ba manutensaun durante fulan-tolu iha Indonézia.

Iha loron 04 fulan-Juñu 2021, ekipa hosi CAC, akompaña hosi Diresaun Nasionál Transporte Marítima (DNTM), hahú halo inspesaun ba ró ne’e  hodi hatene kona-bá kondisaun no mós buka hatene kona-bá prosesu kontratu molok hala’o operasaun.

CAC rasik halo prosesu inspesaun, bazeia ba mandatu ne’ebé hatuur ona iha Lei númeru 8/2009 kona-bá kriasaun CAC nudár instituisaun independente ho knaar atu prevene no kombate krime korrupsaun.

Iha inspesaun ne’e, CAC hakarak hetan relatóriu hosi Ministériu Transporte no Komunikasaun, relasiona ho aluga ró ne’e, bainhira iha indísiu krime maka CAC sei submete ba Ministériu Públiku (MP).

Ho inísiu inspesaun ne’e, maka iha loron 08 fulan-Juñu 2021, Ministru MTK, José Agostinho da Silva, deklara katak, bazeia ba rezultadu inspesaun DNTM, katak ró KMP Tranship II iha kondisaun di’ak atu halo operasaun. Nune’e, iha loron tuir mai,11 fulan-Juñu 2021, Ró ne’e transporta  Primeiru-Ministru (PM), Taur Matan Ruak  ho komitiva (Membru Governu lubuk ida), inklui Konselleiru másimu Partidu KHUNTO, José dos Santos Naimori Bucar ba Postu Administrativu  Ataúro, maibé susar atu atraka iha portu, ikus-mai tenke fila-fali mai Díli ho ró-ahi seluk.

Ho situasaun ne’e, iha loron 12 fulan-Juñu 2021, Ministru MTK, José Agostinho da Silva, ezije fila-fali ba tékniku ró-ahi KMP Tranship II, atu submete relatóriu ofisiál ho loloos ba parte investigadór-sira tanba deskonfia mákina ró nian mak avaria.

Jornalista: Carmelita Isaac