Connect with us
Pakote Ahi

Polítika

Lú Olo: Lakon ka Manán Povu Mak Julga

Published

on

Hatutan.com, (19 Abríl 2022), Dili-Kandidatu Prezidente Repúblika (PR) ho númeru sorteiu rua (2), Francisco Guterres “Lú Olo” dehan, bainhira rezultadu kontajen votu hatudu nia lakon ka manán, ida ne’e, povu mak julga liuhosi eleisaun.

Lee Mós : Ramos-Horta “Dudu-sees” Lú Olo ho Alkatiri iha Sentru Votasaun EBC Farol

Kandidatu Prezidente Repúblika, Francisco Guterres “Lú Olo” ho espoza Cidalia Mouzinho Nobre Guterres, vota iha eleisaun segunda volta, 19 Abríl 2022. Foto/Hatutan.com

Maske nune’e, Sekretáriu jerál partidu FRETILIN, Marí Alkatiri, ne’ebé akompaña kandidatu PR husi FRETILIN, Francisco Guterres “Lú Olo’ ne’ebé ba vota iha Sentru Votasaun EBF Farol, Dili, Tersa (19/04/2022), deklara ho otimista boot katak  Lú Olo manán duni iha eleisaun prezidensiál segunda volta ne’e.

“Ha’u hanoin katak, prontu, demokrasia mak hanesan ne’e duni, lakon ka manan, povu mak julga. Ohin, iha loron ida-ne’e duni, povu mak sei julga. Ha’u konfiante, ha’u garante ida-ne’e, hanesan mós horibainhira ha’u hatete ona, maibé husik rezultadu maka sei determina,” Francisco Guterres “Lú Olo” hateten ba jornalista sira, hafoin ejerse nia direitu síviku hodi vota iha Sentru Votasaun EBF Farol, Suku Motael, Postu Administrativu Na’in-Feto, Munisipiu Díli.

Advertisement

Lú Olo afirma, matadalan ba demokrasia nian maka fó liberdade ba sidadaun hotu-hotu atu hili tuir nia hakarak, tanba ne’e, iha eleisaun ne’e mak rezultadu hatudu karik nia lakon ka manan mós, nia sempre hateten nafatin ho dignidade.

“Ohin ha’u mai vota duni, hanesan mós ho povu Timor-Leste tomak, vota ba prezidente repúblika ida Timor-Leste ninian. Ha’u nia apelu ha’u halo tiha ona, ha’u hatete tan dala ida, para atu povu ne’e, agora daudauk mai iha sentru  votasaun, hotu-hotu, para atu hili nia prezidente  repúblika ida,” Lú Olo hateten.

Maske rezultadu eleisaun seidauk iha, maibé Lú Olo kompromete katak, karik nia mak manán iha eleisaun ne’e, hodi re-eleitu ba Prezidente Repúblika 2022-2027, sei garante estabilidade nasionál no hala’o d’eit kna’ar tuir lei inan ka Konstituisaun haruka.

Lú Olo afirma tán, sé manán karik iha eleisaun ne’e, signifika nia re-eleitu ba PR foun ida ba povu Timor-Leste tomak, no kumpre ninia kompromisu  tomak mak durante hato’o iha kampaña eleitorál, hodi bele koopera ho órgaun soberania sira seluk, atu bele garante estabilidade no halo dezenvolvimentu iha TL.

“Ha’u nia votu ne’e signifika ba Timor-Leste, hanesan foin ha’u hatete, signifika pás no estabilidade. Ida ne’e duni mak ha’u hakarak atu hateten nafatin, pás ho estabilidade, la’o hamutuk nafatin ho ita,” Lú Olo tenik.

Advertisement

Kandidatu PR ho númeru sorteiu rua (2), Francisco Guterres “Lú Olo”, akompaña husi nia espoza, Cidália Mouzinho Nobre Guterres, no mós ho Sekretáriu Jerál partidu FRETILIN, Marí Bin Amude Alkatiri, vota iha Eskola Farol, Díli, 19 Abríl 2022. Foto/Hatutan.com

Iha fatin hanesan, Sekretáriu jerál partidu FRETILIN, Marí Bin Amude Alkatiri deklara katak, maske rezultadu eleisaun seidauk fó sai, maibé nia fiar aan Lú Olo tiha ona.

“Ha’u garante. Manán tiha ona. Ha’u nia kandidatu manán tiha ona. Ami hatene halo ami nia sondajen, opinion pull, ami mós halo. Primeira volta ne’e, hakarak ha’u ko’alia iha primeira volta ne’e saida mak akontese. Ha’u la ko’alia, ba ha’u, hotu ona, hotu ona, agora ne’e pájina foun. Ha’u la admite karik manán, tanba ha’u hatene Lú Olo sei manán,” Alkatiri hateten.

Observasaun Hatutan.com iha Sentru Votasaun Escola Básica Fillial (EBF), kandidatu PR ho númeru sorteiu rua (2), Francisco Guterres “Lú Olo”, ne’ebé akompaña nia espoza, Cidália Mouzinho Nobre Guterres, no mós ho Sekretáriu Jerál partidu FRETILIN, Marí Bin Amude Alkatiri, to’o iha sentru votasaun EBF Farol, iha tuku 08:17 Otl.

Iha eleisaun primeira volta, 19 fulan-Marsu liubá, rezultadu eleisaun iha Sentru Votasaun EBC Numeru 01, Farol, Díli, konfirma oin-seluk no kontradís ho deklarasaun Alkatiri no Lú Olo nian, katak Lú Olo manan metin no manan tiha ona.

Kandidatu Prezidente Repúblika (PR) ho númeru sorteiu 14 tempu ne’ebá, José Manuel Ramos-Horta, hetan vitória ho votu 1,144 kompara ho Francisco Guterres “Lú Olo” ne’ebé akumula de’it votu 297 iha Sentru Votasaun EBC Numeru 01, Farol, Díli.

Rezultadu totál votu entre Kandidatu PR sira iha eleisaun primeira volta  iha Sentru Votasaun EBC 01 Farol, Díli mak hanesan, Isabel Ferreira ho votu (11), Hermes da Rosa Correia Barros (61), Ângela Freitas (1), Rogério Lobato (2), Anacleto Ferreira (5), Francisco Guterres “Lú Olo” (297), Milena Pires (57), Lere Anan Timur (161), Armanda Berta dos Santos (54), Antero Benedito da Silva (1), Constâncio Pinto (3), Virgílio Guterres (17), Martinho Gusmão (5), José Ramos Horta (1144), Felisberto Araújo Duarte (2), Mariano Assanami Sabino (105).

Advertisement

Totál eleitór ne’ebé tuir vota na’in-1,953, kompostu hosi mane na’in-113 no feto na’in-940. Totál votu ne’ebé tama iha kaixa laran 1,952. Votu válidu ne’ebé atribui ba kada kandidatu hamutuk 1,926. Votu Nulu hamutuk (21), Rejeitadu (0), Reklamadu (1), no Branku (3).

Jornalista: Rogério Pereira Cárceres

 

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Polítika

Komisaun D Sei Vizita Armazén CLN

Published

on

Hatutan, (14 Juñu 2024), Díli– Komisaun D Parlamentu Nasionál ne’ebé trata asuntu Ekonómia no Dezemvolvimentu sei visita armazén  Sentru Nasionál Lojistiku (CLN, sigla portugés) hodi buka alternativu bá folin foos. 

(more…)

Kontinua Le'e

Polítika

CNRT ho KHUNTO husu Kandidatu Komisáriu CAC Rui Pereira Hala’o Kna’ar ho Imparsialidade

Published

on

Hatutan.com, (13 Juñu 2024), Díli– Bankada Parlamentár CNRT ho KHUNTO husu kandidatu foun komisáriu Komisaun Anti-Korrupsaun  (CAC,sigla portugés), Rui Pereira dos Santos atu hata’o kna’ar ho imparsialidade.

(more…)

Kontinua Le'e

Polítika

Bankada CNRT ho FRETILIN Hein Prezensa Ministra Saúde Élia Amaral iha PN

Published

on

Hatutan.com, (12 Juñu 2024), Díli– Bankada Parlamentár  CNRT no FRETILIN husu  bá Primeiru-Ministru (PM), Kay Rala Xanana Gusmão atu fó autorizasaun bá Ministra Saúde Élia A.A dos Reis Amaral marka prezensa iha Parlamentu Nasionál hodi buka solusaun bá problema saúde iha Timor-Leste.

(more…)

Kontinua Le'e
Advertisement

Trending