Hatutan.com, (19 Abríl 2022), Díli- Kandidatu Prezidente Repúblika (PR) ho númeru sorteiu ida (1), José Manuel Ramos-Horta, garante manan iha eleisaun prezidensiál segunda volta ne’e hodi bele promove diálogu no restaura orden Konstitusionál.

Kandidatu Prezidente Repúblika (PR) ho númeru sorteiu ida (1), José Manuel Ramos Horta, vota iha Sentru Votasaun iha Sede Suku Metiaut, Díli, Tersa (19/04/2022). Foto/Hatutan.com

Ramos-Horta mós dehan, nia prontu lakon bainhira povu kontínua fó fiar ba Kandidatu Prezidente Repúblika,   Francisco Guterres “Lú Olo” tuir espíritu demokrasia ne’ebé Timor-Leste adopta.

Bainhira Horta manan mós nia dehan, sei la trai konfiansa husi povu no konfiansa husi lider nasionál ka prezidente CNRT, Kay Rala Xanana Gusmão ho partidu hotu ne’ebé aposta konfiansa bá nia atu bele ukun tuir kompromisu eleitorál no sai Xefe Estadu ba timoroan hotu.

 “Uainhira ha’u manan ha’u sei halo diálogu ho forsa politika sira iha Parlamentu Nasionál ko’alia ho partidu sira seluk, inklui FRETILIN atu haree ba oin servisu hamutuk para garante estabilidade no pás iha rai ida-ne’e nia laran,” José Ramos Horta hateten hafoin ejerse nia direitu síviku hodi ba vota iha sentru votasaun iha Sede Suku Metiaut, Díli, Tersa (19/04/2022).

 “Ha’u fiar katak ha’u sei sai Prezidente Repúblika ida atu reprezenta nasaun ne’e bá mundu internasional no sai aman bá povu no hatudu ha’u nia neutralidade ba partidu polítika sira hotu atu kontribui ba povu nia moris di’ak,” Horta afirma tan.

Iha parte seluk premiadu Nobel ba Pás 1996 ne’e dehan, Estadu direitu, demokratiku respeitu ba Konstituisaun tamba ne’e vitóriaa ne’ebé nia hetan ne’e povu nia vitória atu bele restaura hikas orden konstitusionál no hadi’a relasaun diplomasia ho pais sira iha mundu no aselera adezaun Timor Leste ba membru ASEAN.

Jornalista: Vito Salvador