Hatutan.com, (22 Abríl 2022), Díli—Tribunál Distritál Dili (TDD) liu hosi leitura sentensa ne’ebé lee sai hosi juiz koletiva Ercilia de Jesus, Afonso Carmona no Evangelino Belo deside aplika pena prizaun tinan tolu.

Maibé, suspende ninia ezekusaun tinan tolu ba arguidu Daniel da Costa Soares ba krime abuzu konfiansa, falsifikasaun agravada no kontrafasaun ba selu, relasiona ho falsifikasaun karimbu no asinatura funsionáriu BNU hodi la kontribui taxa kontentór hosi Kmanek Supermerkadu ba kofre Estadu.

Lee Mós: Falsifika Karimbu BNU, MP Husu TDD Aplika Pena Efetivu Tinan-tolu ba Arguidu

Razaun Tribunál aplika pena refere, tanba faktus provadu bazeia ba konviksaun arguidu durante julgamentu katak nia utiliza duni osan refere hodi la selu taxa liu hosi dalan falsifika karimbu no asinatura funsionáriu BNU.

Maski nune’e, Tribunál konsidera sirkunstánsia hotu ne’ebé iha katak arguidu iha arrependimentu no koopera di’ak ho justisa hodi konfesa faktus hotu no antes tama julgamentu arguidu mós devolve ona osan ne’ebé nia uza.

Tanba ne’e, Tribunál esplika ba arguidu katak arguidu la presiza tama prizaun, maibé iha liur durante tinan tolu ho kondisaun ida katak arguidu labele komete tán kualkér krime, maibé bainhira komete tán maka arguidu sei ba tama prizaun durante tinan tolu.

Antes ne’e, tuir akuzasaun hosi MP katak arguidu servisu hanesan intermediáriu ka broker iha Portu Dili, dezde tinan 2012 ho servisu prinsipál maka trata dokumentu atividade emprezariál no hahú loron 24 fulan Dezembru tinan-2016, arguidu servisu nudár funsionáriu ka broker ba empreza supermerkadu balun iha Dili ho obrigasaun trata dokumentu liga kontentór ne’ebé tama iha portu Dili.

Arguidu sai ona broker ba empreza supermerkadu refere ho nune’e taxa kona-bá kontentór nian entrega hotu ba arguidu mak ba selu iha BNU inklui taxa demora (Demorate fee).

Iha loron-23, fulan-Marsu tinan-2018, hale’u tuku 11:00, funsionáriu balun iha APORTIL fó hatene ba investigadór hosi Polísia Nasionál Servisu Investigasaun Kriminál (PNSIC, sigla portugés) katak iha indivíduu ida lori dokumentu falsu inklui karimbu hosi BNU ba trata pagamentu iha APORTIL, tanba ne’e membru PNSIC dezloka ba APORTIL hodi konfirma kona-bá verasidade informasaun refere.

Bainhira membru PNSIC to’o iha Portu Dili, funsionáriu APORTIL aprezenta arguidu ba PNSIC inklui ho dokumentu no karimbu BNU ne’ebé mak arguidu falsifika, tanba ne’e PNSIC halo kedan detensaun ba arguidu no halo mós Apreensaun ba dokumentu ho Karimbu.

Konforme invoice hosi APORTIL katak parte finansa supermerkadu ida iha Dili ne’e  entrega Osan ho kuantia $26.305 iha faze 24 hodi ba selu taxa kontentór iha BNU, maibé arguidu la ba selu hodi prepara de’it dokumentu no formuláriu pagamentu falsu hosi BNU hodi falsifika karimbu BNU inklui asinatura funsionáriu BNU.

Ho dokumentu no karimbu falsu sira ne’e, arguidu apropria tiha osan ho montante $26, 305 ne’ebé tuir loloos tama ba konta Estadu nudár taxa ne’ebé mak Empreza Supermerkadu refere tenke selu, maibé iha loron 23 fulan-Marsu 2018, arguidu selu ona, tanba ne’e MP akuza arguidu ba pratika krime abuzu konfiansa, falsifikasaun agravada ho kontrafasaun ba selu, kuñu, marka ka xansela ne’ebé previstu iha artigu, 257,304, 310 reforsa ho artigu 35 hosi Kódigu Penál TL.

Audiénsia julgamentu ne’e, prezide hosi juiz koletiva Ercilia de Jesus, Afonso Carmona, Evangelino Belo, MP reprezenta hosi Prokuradór Matias Soares no arguidu hetan asisténsia legál hosi Advogada Privada Adelina Lobo ho Virna Carvalho.

Jornalista: Carmelita Isaac