Connect with us
Pakote Ahi

Dili

Governu Aloka $430,000 Bá Preparasaun Terrenu Festa 20 Maiu iha Tasitolu

Published

on

Hatutan.com, (23 Abril 2022), Díli- Governu liuhusi Ministériu Administrasaun Estatál (MAE) aloka orsamentu ho montante $430,000.00 hodi estabelese kontratu ho empreza Betuhei Unip. Lda no fó fali sub-kontratu bá Empreza Fikikay Unip. Lda, hodi ezekuta servisu fíziku iha terrenu bá selebrasaun festa restaurasaun independénsia bá dala-20, (20 Maiu 2002-20 Maiu 2022) iha Tasitolu, Díli.

Empreza Fikikay Unip. Lda,hahú monta tenda iha fatin serímonia loron restaurasaun indepedénsia ba dala-20 iha Tasitolu, Díli. Foto/Hatutan.com

Empreza implementadór projetu preparasaun fíziku bá fatin serimónia iha Tasitolu, Díli, hahú ona servisu dezde loron 01 fulan-Abríl tuir kontratu ne’ebé selebra ho Governu hodi hahú monta tenda iha fatin serimónia no hahú halo mós preparasaun seluk hanesan halo aterru bá fatin parajen karreta bá bainka espesiál sira, inklui b ámembru órgaun soberanu sira, hadi’a no aterru fatin sira iha resintu, aparu ai-sanak sira no hahú monta besi ka barrajen bá atu asegura bainaka espesial sira no mós fatin han bá VIP nian.

Manajer Empreza Fikikay Unip. Lda, Egidio de Jesus, bá Hatutan.com iha Tasitolu, Díli, Sábadu (23/02/2022), hateten projetu preparasaun bá fatin serimónia 20 fulan-Maiu no Tomada de posse bá Prezidente Repúblika eleitu, José Manuel Ramos-Horta ne’e, empreza Fikikay Unip. Lda simu tutan ka hanesan sub husi Empreza Betuhei Unip. Lda ne’ebé manan konkursu públiku liu husu aprovizionamentu MAE nian.

Nia afirma, totál orsamentu ba projetu preparasaun fíziku iha fatin serimónia Tasitolu hamutuk $ 430.000.00. Projetu ne’e liu husi konkursu públika no na’in bá projetu makGgovernu liu husi MAE, nune’e sira halo konkursu no iha empreza lubuk ida mak bá konkorre no ikus mai empreza nasional Betuhei Unip. Lda mak manan konkursu ida ne’e.

Advertisement

“Empreza Betuhei Unip. Lda mak manan projetu ida ne’e liu husi konkursu públiku ne’ebé halo husi Aprovizionamentu MAE nian no ami Fikikay Unip. Lda hanesan empreza implementadór tamba simu tutan kontratu husi empreza vendedór Betuhei Unip. Lda,” Egidio de Jesus hateten.

Traballadór sira servisu monta tenda iha fatin serimónia 20 Maiu 2022 iha Tasitolu, Díli. Foto/Hatutan.com

Empreza Fikikay Unip. Lda ne’ebé nu’udár implementadór bá projetu refere sei halo preparasaun ba fatin serimónia, inklui hadi’a no reabilita arredores tomak iha resintu serimonia nian, Tasitolu, hahú husi liña entrada uma adat Tasitolu tama too iha fatin serimóniaa.

Tuir dezeñu ne’ebé iha empreza sei monta tenda  hamutuk lima ba kada kategoria hodi simu bainaka sira husi liur inklui mós ho tenda ba animasaun no tenda ki’ik sira ne’ebé sei reprezenta kada munisípiu hale’u tenda prinsipál ne’ebé sei sai fatin posse ba prezidente  foun 2022-2027.

Oras ne’e empreza Fikikay Unip. Lda monta ona tenda prinsipál ne’ebé ho medida 30×25 inklui tenda rua seluk ne’ebé ho medida 30×20 no tenda rua seluk sei hein husi Kupaun, Indonézia.

“Ami-nia servisu atinje ona porsentu 60 tamba tenda prinsipál ami monta besik remata ona no hein deit rua husi Indonézia ne’e sei to’o iha sema ne’e nia laran hodi monta no finaliza pois entrega ba Governu” nia haktuir.

Manajer empreza Fikikay Unip. Lda ne’e hatutan traballadór sira ne’ebé servisu iha fatin preparasaun maioria timoroan ho total ema besik 200 no sei garante kualidade ho prestasaun servisu ida rigór tuir kondisaun ne’ebé públiku hakarak.

Advertisement

Tuir observasaun Hatutan.com iha terrenu hatudu empreza hahú mobiliza nia traballadór sira hodi hadi’a fatin sira iha arredores Tasitolu hahú husi hadi’a dalan ki’ik oan sira iha laran, tau barrajen bá fatin serimónia nian, hahú husi uma adat Tasitolu tama ba fatin serimónia.

Empreza mós hahú halo instalasaun ba eletrisidade no monta sanitasaun públiku atu garante selebrasaun loron restaurasaun independénsia no serimónia toma de posse la’o di’ak no susesu.

Jornalista: Vito Salvador

 

 

Advertisement

 

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Dili

Laiha Resibu, Fulan-Rua Ona Munisípiu Díli La Rekolla Reseita hosi Estasionamentu Sira

Published

on

Hatutan.com, (12 Abríl 2024), Díli—Autoridade Munisípiu Díli liuhosi Diresaun Servisu Obras Públiku, fulan-rua (2) ona, la rekolla reseita hosi pagamentu estasionamentu nian iha Dili laran tanba la iha resibu ka billete.

(more…)

Kontinua Le'e

Dili

Munisípiu Díli Prepara Rekursu Superviziona Regra Soe Fo’er iha Kada Aldeia To’o Bairru Sira

Published

on

Hatutan.com, (09 Abríl 2024), Díli—Autoridade Munisípiu Díli prepara daudaun rekursu hodi halo supervizaun no monitorizasaun bá regra soe fo’er hosi kedas aldeia to’o bairru sira iha Dili laran.

(more…)

Kontinua Le'e

Dili

Dom Virgílio Husu Devotu Jesus Divina Mizerikórdia Aplika Obra Mizerikórdia iha Moris Loron-Loron

Published

on

Hatutan.com, (07 Abríl 2024), Díli—Iha selebrasaun Domingu dahuluk bá Domingu Paskua nian Domingu Divina Mizerikórdia, Dom Virgílio Kardeál do Carmo da Silva, SDB  husu bá sarani sira liu-liu Devotu Jesus Divina Misericordia atu aplika obra misericordia iha moris loron-loron.

(more…)

Kontinua Le'e
Advertisement

Trending