Hatutan.com, (19 Abríl 2022), Díli—Rezultadu provizóriu eleisaun prezidensiál segunda volta, Tersa (19/04/2022),  Kandidatu Prezidente Repúblika, José Manuel Ramos-Horta Vs Francisco Guterres “Lú Olo” iha Sentru Votasaun EBF Nú 01, Faról, Díli, nu’udár área horik-fatin no fatin votasaun bá  Francisco Guterres “Lú Olo” ho Sekretáriu Jerál partidu FRETILIN, Marí Bin Amude Alkatiri, la fó rezultadu di’ak. 

Lee Mós: Lú Olo: Lakon ka Manán Povu Mak Julga

Kandidatu PR ho númeru sorteiu rua (2), Francisco Guterres “Lú Olo”, akompaña husi nia espoza, Cidália Mouzinho Nobre Guterres, no mós ho Sekretáriu Jerál partidu FRETILIN, Marí Bin Amude Alkatiri, vota iha EBF Nú.01, Farol, Díli, 19 Abríl 2022. Foto/Hatutan.com

Kandidatu Prezidente Repúblika husi partidu FRETILIN, Francisco Guterres “Lú Olo” hetan “derrota” ho de’it votu 488 kompara ho José Manuel Ramos-Horta ne’ebé manan ho votu 1373.

Prosesu kontajen votu iha sentru votasaun EBF númeru 1, Farol ne’e, hala’o durante oras ualu (8), hahú hosi tuku 15:52 loro-kraik to’o tuku 20:05 kalan ne’e no rezultadu hatudu katak, Horta mak lidera provizóriu.

Iha sentru votasaun ne’e duni, Sekretáriu jerál partidu FRETILIN, Marí Bin Amude Alkatiri deklara bá públiku liu husi jornalista sira katak, maske rezultadu eleisaun seidauk fó sai, maibé nia fiar metin Lú Olo tiha ona.

“Ha’u garante. Manán tiha ona. Ha’u nia kandidatu manán tiha ona. Ami hatene halo ami nia sondajen, opinion poll, ami mós halo. Primeira volta ne’e, hakarak ha’u ko’alia iha primeira volta ne’e saida mak akontese. Ha’u la ko’alia, ba ha’u, hotu ona, hotu ona, agora ne’e pájina foun. Ha’u la admite karik manán, tanba ha’u hatene Lú Olo sei manán,” Alkatiri hateten hafoin ejerse nia direitu votu iha Sentru Votasaun Sentru Votasaun EBF Faról, Suku Motael, Postu Administrativu Na’in-Feto, Munisipiu Díli.

Tuir dadus hosi Sekretariadu Tékniku ba Administrasaun Eleitorál (STAE), eleitór ne’ebé rejistu iha sentru votasaun EBF Faról  hamutuk 3800, maibé iha eleitór hamutuk 1873 mak ejerse sira-nia direitu votu no eleitór kuaze rihun ida resin mak la tuir vota.

Totál votu válidu hosi kandidatu PR na’in-rua nian, hamutuk 1861, Votu Abandonadu 0, Rezeitadu 0, Nulu 12, Branku 0, no Reklamadu 0.

Situasaun seluk ne’ebé Hatutan.com observa iha sentru votasaun ne’e, nota katak, durante minutu tolu nia laran, brigada ka polling staff sira STAE hapara tiha prosesu kontajen, tanba mosu haklalak hosi apoiante sira ne’ebé  mak ho entuziazmu akompaña prosesu kontajen ne’e.

Maske nune’e, durante hahú votasaun tuku 07:00 Otl, to’o iha prosesu kontajen votu ne’e, laiha insidente ruma mak akontese iha sentru votasaun EBF númeru 1 Faról, Dili.

Iha rezultadu eleisaun prezidensiál primeira volta, Horta manan iha sentru votasaun refere ho votu hamutuk 1148 no Lú Olo, hela ho votu 179.

Jornalista: Rogério Pereira Cárceres