Hatutan.com, (23 Abríl 2022), Díli-Polísia Nasionál Timor Leste (PNTL), daudaun ne’e, halo identifikasaun no buka-tuir hela Id-Facebook ho naran “Lola Rangel” ne’ebé hakerek no esplla propaganda iha konta Facebook grupu P-KHUNTO (Kmanek Haburas Unidade Nacional Timor Oan) katak atu tiru-mate Prezidente eleitu, José Ramos-Horta ho Lider Karizmátiku Kay Rala Xanana Gusmão.

Lee Mós : PNTL Kaptura Autór Prinsipál Na’in-rua Halo Voice Virál iha SosMed Kona-bá Planu Asalta Bis Lospalos-Manatuto

Propaganda falsu iha Facebook

Id-Facebook “Lola Rangel” hakerek propaganda iha konta Facebook grupu P-KHUNTO (Kmanek Haburas Unidade Nacional Timor Oan) katak, “Arabi kakutak teroris ho Deputadu F2000 insial M telefone vice Ministru Iinteiror Bou Armindo haruka tiru Xanana ho Horta. Bou Armindo lakohi koalia barak, lalais hato’o info ba Bou Naimori, Bou Naimori hakfodak no rejeita kedan. Iha oin husu dialogue!!!!!  Segredu nakloke tan det”.

“Ezatamente, sua-exelénsia Vise-Ministru Interiór António Armindo rasik mós rejeita tiha ona, maibé, ida-ne’e estratéjia polísia ninian, sei buka tuir hela. Ne’ebé bainhira ita identifika, lokaliza no kaptura, ita sei anunsia hanesan ho kazu sira seluk ne’ebé mak la’o iha loron 20 fulan-Abríl ne’e,” Portavós Komandu Jerál PNTL, Superintendente Xefe Armando Monteiro hateten ba jornalista sira, liuhosi konferénsia imprensa iha Kuartél Jerál PNTL, Díli, Sábadu (23/04/2022).

“Buat ida informasaun, ho espalla informasaun, no autór lansa propaganda, ne’e ajitasaun, ita halo separasaun. Ami PNTL, iha nia analiza oinsá atu bele halo komparasaun ho komunikasaun sidadaun iha rede sosiál,” Armando Monteiro afirma.

Antes ne’e, iha loron 17 fulan-Abríl 2022, hafoin serimónia dezlokasaun membru PNTL ba seguransa eleisaun prezidensiál segunda volta iha sentru votasaun hotu iha munisipiu sira, Komandante Jerál PNTL, Komisáriu Faustino da Costa, afirma ona katak, laiha kilat ilegál iha Timor-Leste.

Molok ne’e, Vise-Ministru Interiór, António Armindo deklara ona katak informasaun ne’ebé espalla iha Sosiál Media (SosMed) katak atu tiru-mate Ramos-Horta ho Xanana ne’e bosok no laloos.

Vie-Ministru António Armindo mós haruka ona karta ba Komandu PNTL atu halo identifikasaun no buka-tuir autór ne’ebé espalla propaganda ne’e.

Jornalista: Rogério Pereira Cárceres