Hatutan.com, (23 Abríl 2022), Díli-Polísia Nasionál Timor-Leste (PNTL) liuhosi Servisu Investigasaun Kriminál (SIK  kaptura ona autór na’in-rua ho inisiál PHM (tinan 26) ho AM (tinan 40) iha área Hali-dolar, Suku Hera, Postu Administrativu Cristo Rei, Munisípiu Díli, ne’ebé halo voice virál iha sosiál media (SosMed) iha Facebook no WhatsApp, hodi ameasa ho planu atu asalta bis sira mai husi Munisípiu Lautem ho Manatuto.

Autór prinsipál na’in-rua ne’ebé lansa ameasa atu atake bis husi Lautem ho Lospalos. Foto/Hatutan.com

Portavós Komandu Jerál PNTL, Superintendente Xefe Armando Monteiro informa, hafoin eleisaun prezidensiál segunda volta, 19 Abríl liubá no iha kalan tuir mai, purvolta tuku 20:30 Otl, iha grupu balu lansa propaganda no ajitasaun iha rede sosiál ne’ebé mak espalla iha públiku, ho objetivu ne’ebé klaru, atu halo ameasa no ataka ba movimentu transporte ne’ebé mak viajen hosi munisípiu rua, Lospalos ho Manatuto.

“Situasaun hirak no ezijénsia hirak ida ne’e, PNTL intensiva ninia estratéjia operasaun ida ne’ebé mak hahú horibainrua kedas, no ohin dadeer, ami identifika no lokaliza, autór prinsipál ne’ebé mak durante ida ne’e lansa propaganda iha SosMed, no kaptura iha Hali-dolar, Hera, Cristo Rei, Dili,” Portavós Komandu jerál PNTL, Superintendente Xefe Armando Monteiro informa bá jornalista sira, liuhosi konferénsia imprensa iha kuartél jerál  PNTL, Caicoli, Díli, Sábadu (23/04/2022).

Autór sira ne’e, PNTL kaptura, Sábadu ohin, maizumenus tuku 08:30 dadeer, iha área Hali-dolar, Suku Hera, Díli. Oras ne’e, suspeitu sira, submete hela ba prosesu investigasaun iha Servisu Investigasaun Kriminál Nasional, kuartél jerál PNTL.

Advertisement

Komandu Jerál PNTL halo konférnesia imprensa hodi relata bá publiku kona-bá autór na’in-rua ne’ebé PNTL kaptura ona tanba lansa emasas husi SosMed atu atake bis husi Lospalos ho Manatuto. Foto/Hatutan.com

Hatán kona-bá autór sira ne’e orijinalidade hosi munisípiu ida ne’ebé, komandante Armando dehan, ida ne’e segredu prosesu investigasaun nian, maibé inisiálmente, PNTL identifika no kaptura ona no identifika ona mós ema na’in-lima seluk, ne’ebé mak sira kria grupu ketak ida hodi lansa komunikasaun iha SosMed.  

Komandu jerál PNTL apela ba sidadaun hotu, alerta, no labele pániku, fiar autoridade seguransa ne’ebé besik, ka autoridade lokál, informa, bainhira iha movimentu ka indikasaun krime ne’ebé kria tenta estabilidade seguransa iha povu no rai ida ne’e, informa lalais, hodi nune’e PNTL ho autoridade seguransa sira Estadu nian tomak, bele hola medida preventivu ka represivu imediata, hodi nune’e komunidade moris lívre, pás, ho hakmatek no kontinua hala’o sira nia atividade moris loro-loron ho seguru, no kontribui liután ba prosesu dezenvolvimentu.

Tuir lei, autór  sé de’it mak halo planu hodi halo atake ema seluk, sei ameasa kadeia tinan-rua no bele multa tanba konsidera krime públiku ho objetivu ne’ebé klaru bá krime no hamosu instabilidade nasionál.

Jornalista: Rogério Pereira Cárceres

Advertisement