Hatutan.com, (03 Maiu 2022), Díli- Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, husu atu jornalista sira adapta ho realidade no teknolojia hodi promove partisipasaun sidadaun sira-nian iha vida polítika no prosesu demokratizasaun iha país Timor-Leste.

Lee Mós: MAPKOMS La Fó Komentáriu Kona-bá Kazu Projetu Instalasaun Set-top Box RTTL,E.P

Ministru MAPKOMS, Francisco Martins da Costa Pereira Jerónimo. Foto/Hatutan.com

Iha komemorasaun loron mundiál liberdade Imprensa,  Tersa (03/05/2022), Conselho Imprensa Timor Leste organiza semináriu nasionál ho Tema “Jornalizmu Iha Ameasa Dijitalizasaun” ne’ebé marka prezensa iha semináriu ne’e Ministru MAPKOMS, Mídia na’in sira no Jornalista hotu husi media konvensionál no mós eletróniku hamutuk ho universitáriu sira husi UNPAZ, UNTL no UNITAL.

Iha diskursu, Ministru MAPKOMS, Francisco Martins da Costa Pereira Jerónimo, hateten ho komemorasaun loron liberdade imprensa, jornalista sira halo nafatin adaptasaun bá inovasaun teknolojia sira ne’ebé mosu iha mundu tuir evolusaun teknolojia ne’ebé hatudu Jornál, Rádiu, Televizaun no mídia Online sira kompleta malu.

Nia dehan, bainhira internet hahú moris iha final sékulu  XX, ema barak profetiza katak mídia konvensionál sira sei mate  tamba ho internet buat hotu lais no sei lori efeitu negativu bá media konvensionál, maibé realidade ida-ne’e seidauk akontese no iha Timor-Leste mídia konvensionál sira sei nafatin sobrevive.

Nia afirma iha istória tomak jornalizmu no meiu komunikasaun sosiál nian sempre iha adaptasaun, nune’e ba mudansa teknolojia no mudansa ema nia toman no ezijénsia boot liu tamba teknolojia fó dalan atu simu buat hotu ho lais no kompletu liu, personaliza ho di’ak liu halo dalabarak ema hakarak ida lais liu.

Governante ne’e hatutan ho meiu dijitál sira ne’ebé iha atividade jornalista la’ós lakon, maibé aumenta, barak bá beibeik, halo kapasidade atu halo servisu di’ak liután tamba haree bá deseju iha kraik (leitór ka audiénsia sira nian). Jornalizmu tenke haree mós bá teknolojia hanesan apoiu ida atu hadi’a sira-nia aktividade.

 “Ha’u dehan jornalista tenke adapta ho realidade, ida-ne’e sai ona pontu importante ida atu nune’e ita bele haree tamba teknolojia foun ita sei labele impede no nia sei mai nafatin,” Ministru Francisco Jerónimo hateten.

Tuir nia observasaun, públiku ne’ebé agora lakohi simu notísia hanesan uluk karik tamba agora ema hakarak hare video, gráfiku no dokumentu inklui fonte husi notísia no seluk tan ho informasaun komplementár no seluk tan depende bá ema ida nia hakarak iha ne’ebé nia bá ka tur ho de’it smart phone nia bele asesu ona notísia.

“Husu ita hotu nia responsabilidade, atu nune’e, oinsá ita bele hatún notísia ho di’ak, kualidade no responsavel bá notísia ne’ebé ita hatún, atu nune’e, labele hamosu fali desinformasaun,” Ministru MAPKOMS afirma tan.

Jornalista: Vito Salvador