Hatutan.com, (04 Maiu 2022), Díli- Comissão Nasional Educação Catolica Timor Leste (CONECTIL) husu prezidente eleitu, José Ramos-Horta, tau matan bá kualidade edukasaun liu husi kriasaun gabinete edukasaun Prezidente Repúblika, atu nune’e, bele tulun Governu eleva kualidade edukasaun tuir padraun internasionál.

Lee Mós : Prezidente Xina Promete Bá Ramos-Horta Hametin Kooperasaun Bilateral

CONECTIL halo enkontru ho Prezidente Eleitu, José Ramos-Horta, Kuarta (04/05/2022). Foto/Hatutan.com

Prezidente CONECTIL, Pe. Mateus Afonso bá jornalista sira, hafoin hasoru malu ho prezidente eleitu, José Ramos-Horta iha gabinete Nobel bá Pás nian iha Faról, Díli, Kuarta (04/05/2022),  hateten, edukasaun ne’e buat importante tamba ne’e presidente eleitu disponibiliza tempu mai CONECTIL atu bele ko’alia hodi fó ideia ruma oinsá hamutuk halo buat ruma bá edukasaun iha Timor-Leste.

CONECTIL la husu atu prezidente eleitu foti Ministériu Edukasaun nia kompeténsia, maibé bele hamosu iha nia gabinete departamentu ida ne’ebé toka buat ruma kona-bá edukasaun para fó ideia, promove no dudu tan edukasaun iha nivel hotu, hahú husi ensinu pre-primária to’o iha sekundária inklui mós ba nivel ensinu superiór nian.

“CONECTIL haree katak Timor-Leste maioria katóliku tamba ne’e atu valor kristaun labele de’it aparese iha eskola sira ne’ebé katóliku, maibé mós bá eskola públiku sira, ita haree katak la’ós kestaun relijiaun ka moral de’it, maibé edukasaun ne’e tenke hola karakter edukasaun katólika,” Pe. Mateus Afonso hateten.

Prezidente CONECTIL ne’e hatutan Prezidente Repúblika hanesan mós Xefe Estadu bele fó motivasaun bá ministerium edukasaun liu husi gabinete edukasaun no bele mós bolu uma kreda hanesan parseria iha edukasaun atu hamutuk tau matan ba edukasaun, hadi’a nia kualidade no  kuda iha foin-sa’e sira-nia moris valor kristaun ne’ebé karakteriza ho edukasaun kristaun.

Hatán bá proposta  CONECTIL ne’e, Prezidente eleitu, José Ramos-Horta hateten, klaru sé iha departamentu ida  liga ho edukasaun, kultura, sosiál, justisa no direitu umanu tamba ne’e hotu komponente boot ida servisu Prezidente Repúblika nian.

“Ha’u nia preokupasaun no maun-boot Xanana nia preokupasaun mak kualidade edukasaun tamba ne’e uainhira ita ko’alia kona-bá kualidade edukasaun tenke metin ho estratéjia hodi hadi’a kualidade edukasaun ba vizaun ida ke ita hakarak povu ne’e hotu-hotu edukadu iha valores umanu, relijioza no spiritual ho parte komponente ida integradu iha tékniku professional, sientífiku para rai ne’e bele kompete iha rejiaun no iha mundu,” José Ramos-Horta hateten.

Horta subliña, iha tinan lima mai ne’e edukasaun iha Timor-Leste tenke adapta tuir sékulu XXI ba nova teknolojia no realidade ekonómika rejionál no mundiál.

Jornalista: Vito Salvador