Hatutan.com, (29 Abril 2022), Díli—Institutu Superiór Filozofia no Teolojia (ISFIT), Dom Jaime Garcia Goulart, Fatumeta realiza graduasaun faze daruak ba estudante na’in 102 hosi fakuldade Filozofia no Teolojia.

Reitór ISFIT, Padre Justino Tanec.

Reitór ISFIT, Padre Justino Tanec konsidera graduasaun ne’e motiva liu tán ISFIT atu dezempeña nia serbisu iha mundu akadémiku nune’e bele kontribui nafatin ba komunidade no Igreja ba produsaun ema kualifikada iha área Filozofia no mós Teolojia.

Lee Mós: Xanana: Igreja Katólika Kontribui Bá Harii Nasaun Timor-Leste

“Ami komprometidu ba ami nia an atu bele prodúz konseitores ba dezenvolvimentu Timor-Leste ne’ebé integradu liu hosi sira nia pareser hodi aprende hosi pontu de vista sira seluk no fó pareser imparsialmente tuir pensamentu sira ne’ebé produtivu no inovativu ba bem komún povu no nasaun Timor-Leste,” Padre Justino Tanec hateten iha salaun S. José Catedrál, Díli, Sesta (29/04/2022).

Reitór ne’e husu estudante hotu-hotu  ne’ebé remata sira nia estudu iha ISFIT, tenke oferese ideia ne’ebé produtivu ba sosiedade, a favór ba sosiedade no Igreja nia prosperiedade no dezenvolvimentu integradu entre razaun no fiar.

Serimónia Segunda graduasaun ISFIT, iha salaun São José Katedrál Dili, Sesta (29/04/2022).

Nune’e mós líder nasionál, Kay Rala Xanana Gusmão ne’ebé partisipa iah serimónia ne’e liu hosi Oratio Sapiensia hateten, eskola hanorin ema katak prosesu hotu-hotu transforma an tanba laiha prosesu ida ne’ebé permanente kedan ona.

Ema presiza hatene beibeik no presiza aprende tán tanba kursu (eskola) de’it la fó koñesimentu hotu-hotu ne’ebé ema hakarak atu hetan, maibé kursu ne’e bele sai hanesan baze di’ak ida atu bele buka hetan liu tán koñesimentu seluk atu ema nia hanoin bele semo as liu tán ba halo analiza hodi kompriende problema oin-oin no hetan koñesimentu liu tán hodi enfrenta iha moris ne’e.

“Ha’u rekomenda ba imi hotu atu hamosu iha iha imi ida-idak nia an rasik kultura ba leitura no ba diskusaun ho kolega no seniór sira hodi buka hatene saida mak imi lee no estuda tán, atu imi bele kompriende katak teoria hotu-hotu di’ak no ida di’ak liu mak teoria ida ne’ebé ita bele aplika ba realidade konkreta,” Kay Rala Xanana Gusmão hateten.

Lider karismátiku ne’e hatutan, estudante sira ne’ebé estuda no gradua hosi ISFIT tenke sai autór ba mudansa iha mentalidade sosiedade Timor nian no mellora karáter juventude Timor Leste nian ho siénsia ne’ebé iha atu ema bele aprende haraik an, servi ema seluk, respeita ema seluk hodi kria armonia no espíritu haraik an hodi koopera ho ema seluk.

Iha fatin hanesan, estudante ne’ebé hetan klasifikasaun diak liu, hosi Fakuldade Filozofia, Gerson João de Jesus Filipe Ximenes hateten ho serimónia graduasaun ne’e atu festeza susesu ne’ebé kada estudante hatudu durante prosesu naruk iha vida akadémika ne’ebé hakat liu daudaun.

Susesu ne’ebé estudante ida atinze mai hosi dedikasaun ne’ebé formadór no dosente sira oferese hamutuk ho ekipa tomak servisu administrativu instituisaun akadémika ida nian.

Estudante ne’ebé hetan klasifikasaun diak liu, hosi Fakuldade Filozofia, Gerson João de Jesus Filipe Ximenes.

“Graduasaun ida ne’e nu’udár susesu dahuluk no konkista foun ne’ebé loke odamatan ba hakat foun iha mundu akadémiku,” Gerson João de Jesus Felipe Ximenes hateten.

Estudante ne’e rekomenda ba senadu ISFIT atu nafatin sai hanesan promotor ba kultura lee (leitura) hodi hakle’an estudante sira nia koñesimentu atu sai testemuña ba siénsia iha sosiedade.

Totál estudante ne’ebé gradua hosi ISFIT hamutuk na’in 102 kompostu hosi fakuldade Filozofia na’in 83 no Fakuldade Teolojia na’in 19.

ISFIT hahú hamriik nu’udár Institutu Superiór hodi haketak an hosi Semináriu Maiór Interdiosezanu São Pedro no São Paulo, Díli, iha 2012 no hahú halo rejistrasaun ba iha Ministériu Edukasaun Juventude no Desportu (MEJD) iha tinan 2014.

Jornalista: Vito Salvadór