Hatutan.com (05 Maiu 2022), Díli—Tribunál Distritál Díli (TDD) liu husi leitura sentensa ne’ebé prezide husi juiz koletivu Alvaro M. Freitas, Argentino Luíza Nunes ho  José Gonçalves, deside hodi kondena eis Prezidente Parlamentu Nasionál (PPN) atuál membru PN husi Bankada CNRT, Adérito Hugo da Costa ho pena multa $600.00 ho durasaun tempu fulan ida, bá krime furtu simples relasiona ho dada ahi eletrisidade illegal iha tinan 2016.

Lee Mós : MP Alega Adérito Hugo ho Pena Suspensaun Tinan-rua

Arguidu Aderito Hugo da Costa, marka prezensa iha Tribunál Distritál Dili. Foto/Dok.Hatutan.com

Razaun Tribunál aplika pena multa, tanba faktu provadu bazeia bá deklarasaun sasin sira husi parte EDTL ne’ebé komprova katak iha ligasaun ilegál. Maibé, Tribunál konsidera mós sirkunstánsia hotu ne’ebé iha liu-liu arguidu koopera di’ak ho justisa hodi devolve ona osan $2000.00 antes tama julgamentu.

Alende ne’e bazeia faktu hotu ne’ebé iha liu husi deklarasaun sasin nian, Tribunál konsidera la prienxe krime ne’ebé antes ne’e MP akuza hasoru arguidu hanesan krime furtu agravadu, tanba ne’e Tribunál deside halo alterasaun kualifikasaun jurídiku hodi akuza fali arguidu ba krime furtu simples.

Advertisement

Ho nune’e,  Tribunál liuhusi julgamentu, Kinta (05/05/20220, iha Tribunál Distritál Díli, konsidera  la adekuadu bainhira kondena arguidu ho pena prizaun, tanba  hahalok ne’ebé arguidu komete la’ós furtu agravadu.

Iha audiénsia juis Argentino Luíza Nunes, klarifika katak desizaun ne’ebé tribunál foti  imparsiálmente, laiha kazu ruma no bainhira arguidu la simu, bele hatama rekursu liu husi advogadu iha prazu loron 15 nia laran.

Advogadu Privadu, Pedro Apariçio hateten, nia parte seidauk iha desizaun atu halo rekursu   ka lae, tanba sei estuda.

“Tuir lei ha’u nia kliente iha prazu loron 15 nia laran hodi halo rekursu, Maibé, ami sei estuda ho desizaun juis nian, tanba ne’e ami seidauk bele selu pena multa refere,” Pedro Apariçio ba jornalista sira hafoin leitura sentensa iha TDD.

Antes ne’e, tuir akuzasaun hosi Ministériu Públiku (MP), katak iha loron 02 fulan-Maiu 2016, bazeia ba relatóriu kontajen enerjia ne’ebé relata hosi EDTL hatudu katak, arguidu gasta enerjia normál $120 kada fulan, maibé realidade lista uza enerjia hahú fulan-Juñu 2016 to’o fulan-Agostu 2017, arguidu gasta enerjia maioria entre $19 to’o $37.

Advertisement

Nune’e, depois de halo komparasaun kontajen bá gastu normál ho montante $120, konklui katak hahú períodu fulan-Juñu 2016 to’o fulan-Agostu 2017, arguidu nia konduta hamosu ona prejuízu ba Estadu ho montante globál $9,760.

Ho hahalok arguidu, MP akuza arguidu ba prátika krime furtu agravadu ne’ebé previstu iha artigu 251 no artigu 252 hosi kódigu penál TL.

Audiénsia julgamentu prezide hosi juis koletivu Alvaro M. Freitas, Argentino Luíza Nunes, José Gonçalves, MP reprezenta hosi Prokuradór Rogério Viegas no arguidu hetan asisténsia legál hosi Advogadu Privadu Pedro Apariçio.

Jornalista: Carmelita Isaac

Advertisement