Hatutan.com, (11 Maiu 2022), Díli—Polísia Nasionál Timor-Leste (PNTL), liuhosi Unidade Patrullamentu Fronteira (UPF), halo apreensaun ba evidénsia sira hanesan Ró ho mina-rai masa hamutuk 55, tanba hala’o transaksaun ilegál hodi tama to’o tasi Timor-Leste nian.

Mina Ilegál ne’ebé UPF halo apreensaun iha Fronteira Tasi Batugade, Tersa (10/05/2022). Foto/PNTL.

Prosesu sira kona-bá apreensaun no kapturasaun ne’e, liuhosi Servisu Sekreta sira UPF nian ho atividade la’o ain, iha área fronteira Batugade, Postu Administrativu Balibo, Munisipiu Bobonaro, Tersa (10/05/2022).

Lee Mós: Arguidu Hatama Sigaru Ilegál Simu Pena Suspensaun Tinan Tolu

“Horikalan madrugada ita nia membru Servisu Sekreta halo vizilánsia iha fronteira tasi ibun iha área Manuhaen Balibo nian no prende ró peskadór ida halo transaksaun ilegál hamutuk ho evidénsia sira mak hanesan, minarai 35 Iitru masa hamutuk 12 no-mós 20 litru masa 33. Entaun totál masa 55 mak ita prende,” Hatutan.com sita deklarasaun Komandante UPF, Superintendente Polísia Euclides Belo, iha komunikadu.

Infelizmente, membru UPF sira la konsege kaptura sidadaun sira ne’ebé halo transksaun ilegál tanba halai sees no so’e hela sira nia sasán iha área tasi-ibun.

“Agora daudaun na’in ba sasán sei deskoñesidu, maibé evidénsia hirak ne’e asegura ona iha Kuartél UPF hodi halo prosesu no buka-tuir suspeitu ne’ebé hatama sasan liuhosi dalan ilegál ne’e,” Komandante Euclides Belo informa.

Jornalista: Rogério Pereira Cárceres