Hatutan.com, (12 Maiu 2022), Díli—Komandu Polísia Nasionál Timor-Leste (PNTL), sei asegura másima serimónia posse ba Prezidente Repúblika (PR) eleitu José Manuel Ramos Horta, ho festa Restaurasaun Independénsia Repúblika Demokrátika Timor-Leste (RDTL) ba dala-XX iha Tasi-tolu.

Vise-Ministru Interiór, António Armindo hamutuk ho Komandante Jerál PNTL, Komisáriu Polísia Faustino da Costa no Segundu Komandante Jerál Komisáriu Mateus Fernandes. Foto/MI.

Komandante Jerál PNTL, Komisáriu Polísia Faustino da Costa fó ona orientasaun ne’ebé sei koloka membru hotu atu bele asegura serimónia ne’e bele la’o ho susesu. 

Lee Mós: PM Taur Informa ba Lú Olo Kona-bá Preparasaun Posse ba Ramos-Horta

PNTL liuhosi komandu Operasaun Nasionál, halo ona koordenasaun ho komisaun organizadora nasionál hodi kontinua atualiza progresu sira preparasaun nian, kona-bá seguransa iha loron 19 to’o 20 fulan-maiu 2022.

Advertisement

“Ita sei koloka seguransa ho másimu atu eventu ne’e tenke la’o ho di’ak, seguru, laiha ambiente ida ne’ebé tauk, laiha atividade ruma fó perturbasaun ba eventu rua ne’e,” Komisáriu Polísia, Faustino da Costa hateten ba jornalista sira, hafoin enkontru preparasaun seguransa 20 Maiu, ho komandante munisipiu sira iha Sua Room, Timor Plaza, Kinta (12/05/2022).

Iha órden seguransa ba serimónia boot no importante rua ne’e, Komandu PNTL kuaze involve hotu nia membru sira ho másimu, hahú kedan hosi bainhira prezensa bainaka sira nasaun liur nian iha TL, to’o serimónia ikus iha loron 20 fulan-Maiu.

“Ita aprezenta ona ba komandante sira atu kria tarrefas kolokasaun ba ema sira ne’e, tuir órden diretiva ne’ebé komandu operasaun hasai ona,” Komandante Faustino hateten.

Kona-bá lista bainaka hosi nasaun liur ne’ebé mak atu partisipa iha eventu importante rua ne’e, PNTL sei iha dezafiu, tanba seidauk iha lista finál kona-bá entidade ne’ebé atu mai.

Maibé, komandu PNTL nia órden operasaun sei nakloke, bainhira iha lista adisionál ruma kona-bá entidade alta sira ne’ebé karik konfirmadu atu mai tán, parte komandu bele ajusta de’it ninia membru sira ne’ebé mak iha ona.

Advertisement

PNTL mós sei hasoru difikuldade iha parte transporte ninian, ne’ebé sei limitadu. Maibé, internalmente PNTL preparadu atu kria kondisaun nafatin tanba Governu liuhosi Ministériu Interior, disponível atu bele apoiu tán karreta ba PNTL.

Durante ne’e PNTL ho FALINTIL Forsa Defeza Timor-Leste (F-FDTL) sempre iha koordenasaun hodi atualiza ba malu kona-bá oinsá atu asegura serimónia boot rua ne’e, liu-liu fó eskolta ba entidade Verry Importante Person (VIP).

“Ida ne’e iha ona akordu entre PNTL ho F-FDTL kona-bá kolokasaun seguransa. Ida-ne’e klaru katak, instituisaun ida-ne’e tenke garante duni, ne’ebé saida de’it mak mosu iha eventu sira ne’e sei la tolera,” nia hateten.

Tuir planu, iha órden ba seguransa ne’e, PNTL liuhosi Unidade Polisia Marítima (UPM), ho F-FDTL liuhosi nia Komponente Navál, sei halo mós operasaun seguransa iha tasi-laran, área Tasi-tolu, Díli.

Tuir lista bainaka ne’ebé PNTL asesa ona mak hanesan, Governadór Austrália, Primeiru Ministru hosi Cambodia, Prezidente Repúblika (PR) Portugál, Marcelo Rebelo de Sousa, ho seluk tán.

Advertisement

Hatán kona-bá transporte ba PNTL sei limitadu, Vise Ministru Interior (VMI), António Armindo informa governu sei aluga tán karreta hamutuk 10 hodi fó apoiu ba membru sira atu asegura seremónia importante rua ne’e.

“Ita sei haree atu aluga tán karreta 10 no hosi ministériu mós iha Segunda ne’e apoia tán karreta 10. Ita iha transporte ne’ebé mak sufisiente atu apoia PNTL,” António Armindo hateten.

Jornalista: Rogério Pereira Cárceres

Advertisement