Hatutan.com, (16 Maiu 2022), Díli– Federasaun Futeból Timor Leste (FFTL) rekoñese performa selesaun nasionál iha jogu Sea Games Vietnam “monu” no  la hatudu rezultadu di’ak nune’e Timor-Leste tenke deskualifika iha faze grupu ho pontu zero.

Lee Mós : Seidauk iha Serteza Kona-bá Liga Futeból Époka 2022-2023

Selesaun Nasionál U23 joga SEA GAMES bá dala-XXXI iha Vietnam . Foto/Espesiál

Timor-Leste hamutuk ho nasaun haat, seluk iha grupu A hanesan Indonesia, Myanmar, Filipina, Vietnam no husi  jogu haat ne’ebé Timor-Leste enfrenta derrota total no la rekolla pontu pozitivu ida hodi muda klasifikasaun Timor-Leste iha tabele klasifikasaun, nune’e Timor-Leste obrigadu tenke okupa zona okos tabele klasifikasaun iha faze grupu ho pontu zero.

Prezidente FFTL, Francisco Martins da Costa Pereira Jeronimo, hateten performa Timor-Leste iha jogu Sea Games bá dala-XXXI iha Vietnam la hatudu rezultadu pozitivu tamba jogadór selesaun nasionál sira psikolojikamente enfrenta problema relasiona ho sira-nia preparasaun iha Malázia tamba jogadór íntimu na’in-6 hetan Covid-19 iha jogu primeiru hasoru Filipina, nune’e ekipa bá de’it ho jogador suplente.

Nia afirma ho difikuldade no problema sira ne’ebé jogadór sira enfrenta durante preparasaun lori mós implikasaun bá iha performa ekipa nasionál nian, nune’e treinadór mós difisil atu halo adaptasaun bá táktika tamba jogadór menus.

“Ami haree katak ita lakon tamba jogadór sira la kompletu, nune’e, fó impaktu bá ekipa nia performa tun,” Francisco Jeronimo hateten.

Prezidente FFTL ho fuan boot simu rezultadu tamba futeból nia rezultadu mak ida ne’e, dalaruma haree iha fasil maibé rezultadu difisil no todan tamba iha futeból buat hotu bele akontese no influensia husi fatór li’ur mós boot, nune’e ,ekipa bele hasoru difikuldade uainhira enfrenta jogu.

Relasiona ho derrota ne’ebé Timor-Leste enfrenta iha jogu Sea Games Vietnam prezidente FFTL  promote sei halo mós avaliasaun bá servisu ekipa tékniku sira-nian liuliu treinadór prinsipál selesaun nasionál, atu nune’e, bele avalia servisu sira durante ne’e.

Prezidente FFTL ne’e mós informa, hafoin remata jogu iha Sea Games Vietnam, ekipa selesaun nasionál sei kontinua arranka ba iha Qatar hodi halo preparasaun bá jogu internasionál sira ne’ebé Timor-Leste sei enfrenta iha fulan-Juñu iha Kambodia no Laos.

Jornalista: Vito Salvador