Hatutan.com, (23 Maiu 2022), Díli-Polisia Nasionál Timor-Leste (PNTL) Munisípiu Díli, detein  suspeitu na’in-10  tanba hemu tua lanu hodi asalta sira-nia kolega mane na’in-rua iha área Merkadu Taibessi, Postu Administrativu Na’in-Feto, Munisípiu Díli.

Komandante PNTL Munisípiu Díli, Superintendente Xefe Polísia Henrique da Costa. Foto/Hatutan.com

“Iha loron 21 fulan-Maiu ne’e, iha mós insidente ne’ebá mak akontese iha parte área Na’in-Feto nian, Merkadu Taibessi, ne’ebá mak iha grupu ida hemu tua hamutuk depois sira fila asalta fila-fali sira nian kolega na’in-rua hodi halai tama to’o iha postu polísia Taibessi ninan. Suspeitu sira konsege baku vítima na’in-rua to’o kanek grave,” Komandante PNTL Munisípiu Díli,  Superintendente Xefe  Henrique da Costa, hateten ba jornalista sira iha kna’ar fatin,  Caicoli, Segunda (23/05/2022).

Hafoin akontesimentu ne’e, ekipa PNTL ne’ebé halo atuasaun iha terrenu, komunika kedan bá parte ambulánsia hodi transporte vítima na’in-rua bá halo tratamentu intensivu iha  Ospitál Nasionál Guido Valadáres (HNGV).

Komandante Henrique informa, iha rezultadu identifikasaun PNTL nian hatudu katak, vítima sira ne’e ho kondisaun kanek grave, tanba hetan baku ho ai hosi suspeitu sira no evidénsia sira-ne’e iha ona polísia nia liman hodi aprezenta ba iha Ministériu Públiku.

Oras ne’e, vítima sira-nia kondisaun  hahú rekupera maibé presiza tempu atu rekupera totál  no alta hosi HNGV. Alende ne’e,

Seidauk Hatene Motivu hosi Kazu Mate Isin iha Danau II

Iha Sábadu loraik (21/05/2022),  komunidade sira hetan mate-isin ida iha área Tasi-tolu, parte Danau II nian. 

Ho akontesimentu ne’e, Komandu PNTL Munisípiu Díli liuhosi Eskuadra Dom Aleixo, halo kedan patrullamentu bá to’o iha Tasi-tolu, hodi observa direta kondisaun mate-isin ne’ebé komunidade sira hetan.

Prosesu identifikasaun iha terrenu, Eskuadra Dom Aleixo, hamutuk Servisu Investigasaun Kriminál Nasionál (SIKN) mak identifika direta, no observa katak, mate-isin ne’e, nu’udár sidadaun mane ida, ho naran Luis Gama, hosi Postu Administrativu Laga, Munisípiu Baucau. Maibé, to’o oras ne’e, parte PNTL seidauk bele fó sai ba públiku kona-bá motivu sira hosi Luis Gama nia mate, tanba ekipa SIKN sira halo hela investigasaun bá kazu ne’e.

Parte Forensik Nasionál hamutuk ho família evakua kedan mate isin ba iha HNGV hodi halo autópsia.

Jornalista: Rogério Pereira Cárceres