Hatutan.com (24 Maiu 2022), Díli—Atuál Prokuradór Jerál Repúblika (PJR), Alfonso Lopez sai lezadu ba krime ameasa no arma branka ne’ebé deskonfia komete hosi arguidu na’in-rua, MSB no PPSC hasoru lezadu tanba utiliza tudik hodi ameasa no husu osan ba lezadu.

Audiénsia julgamentu ne’ebé prezide hosi juiza singulár Ercilia de Jesus, esplika ba lezadu no arguidu katak krime ameasa iha posibilidade bele dada tanba ho natureza semi públiku no lei fó dalan atu dada.

Lee Mós: PJR Alfonso Lopez, Lezadu ba Krime Ameasa no Arma Branka

Advertisement

Tanba ne’e, liu hosi tentativa konsiliasaun ne’ebé Tribunál halo, lezadu deside dada fila krime ameasa, maibé ba krime arma branka labele dada tanba ho natureza krime públiku.

Bazeia ba desizaun lezadu no arguidu sira nian, Tribunál deside homologa arguidu na’in-rua hosi krime ameasa no kontinua hala’o julgamentu hodi rona arguidu no lezadu liga ho krime arma branka.

Iha audiénsia, arguidu na’in-rua hili sira nia direitu nonok hodi lakohi ko’alia kona-bá sira na’in-rua nia involvimentu ne’ebé utiliza tudik hodi husu osan ba lezadu ne’ebé foin fila hosi musolah.

Iha sorin seluk, lezadu konfirma akuzasaun loos hotu katak arguidu MSB hasai tudik sé ba lezadu nia kabun hodi husu osan no arguidu PPSC hamrik metru ida, maibé ho katana iha liman.

Hafoin rona arguidu no lezadu, Tribunál adi’a hikas julgamentu ba loron seluk hodi kontinua rona sasin no alegasaun hosi Ministériu Públiku (MP).

Advertisement

Antes ne’e, tuir akuzasaun hosi Ministériu Públiku (MP) katak iha loron 13 fulan Dezembru tinan 2019 iha tuku 13:50 iha Marconi, lezadu fila hosi musolah no iha  dalan arguidu na’in-rua hosi kotuk bolu dehan hein lai, nune’e lezadu mós hein, maibé bainhira arguidu besik ba lezadu no arguidu MSB hasai tudik sé ba lezadu nia kabun hodi husu osan no arguidu PPSC hamrik metru ida ho katana, lezadu hakfodak hodi lamas osan, maibé osan laiha.

Tanba ne’e, fó hatene arguidu katak la lori osan no lezadu la’o lalais, maibé arguidu na’in-rua kontinua tuir to’o iha kruzamentu mak foin para.

Bainhira to’o iha uma, lezadu telefone kedan ba Polisia hodi mai iha fatin akontesimentu no halo kedan detensaun ba arguidu PPSC.

Tanba ne’e, MP akuza arguidu na’in-rua ba pratika krime rua hanesan ameasa ne’ebé previstu iha artigu 157 no krime arma branka tuir Lei No 5/2017.

Audiénsia julgamentu ne’e prezide hosi juiza Ercilia de Jesus, MP reprezenta hosi Prokuradór Reinato Berenahak no arguidu sira hetan asisténsia legál hosi Defensór Públiku Fernando Carvalho.

Advertisement

Jornalista: Carmelita Isaac