Hatutan.com (24 Maiu 2022), Díli—Tribunál Distritál Díli (TDD) iha Tersa 24 fulan ne’e, liu hosi alegasaun hosi Ministériu Públiku (MP) ne’ebé reprezenta hosi Prokuradór Ricardo Leite, husu ba Tribunál atu aplika multa ba arguidu na’in-17 ba krime dezobediénsia tanba halo manifestasaun iha área ka korridór edifísiu Ministériu Ensinu Superiór Siénsia no Kultura (MESSK) sen autorizasaun hosi Polísia.

Arguidu na’in-17 ho inisiál DM, M, S, SD, N, VC, CC, ES, DB, TC, V, D, OC, FS, G, HC no C maioria hanesan estudante hosi Universidade Nasionál Timor Lorosa’e (UNTL), Universidade Díli (UNDIL) no Universidade Timor Orientál (UNITAL).

MP husu pena multa tanba faktus provadu katak arguidu sira halo manifestasaun iha fatin ne’ebé tuir loloos halo iha resintu UNTL, maibé arguidu sira deside halo fali iha resintu MESSK.

Hosi parte defeza ne’ebé reprezenta hosi Defensór Públiku Nelson Borges husu ba Tribunál atu absolve nia kliente hosi krime dezobediénsia tanba arguidu sira foin primeira vez mai iha Tribunál hodi koopera di’ak no konfesa imparsiál.

Hafoin alegasaun, juiz prezide marka hikas audiénsia ba loron seluk hodi rona leitura sentensa.

Antes ne’e, tuir akuzasaun hosi MP katak arguidu sira maioria estudante hosi UNTL, UNDIL no UNITAL no iha loron 11 fulan Setembru 2020 tuku 9:00 arguidu sira realiza reuni hodi halo manifestasaun uza espanduk no ba hamrik iha edifísiu MESSK nia oin sen autorizasaun hosi Polisia Nasional Timor-Leste (PNTL).

Tanba ne’e, ekipa PNTL hakbesik hodi husu atu arguidu sira ses hosi fatin ne’e, tanba destinasaun tuir akordu atu halo manifestasaun iha resintu UNTL.

Maski PNTL fó hatene ba arguidu sira, maibé arguidu sira mantein no kontinua nafatin halo manifestasaun iha edifisiu MESSK nia oin.

Tanba ne’e, ekipa PNTL halo kedan kapturasaun ba arguidu sira no detein flagrante delitu iha loron 11 Setembru 2020 iha tuku 9:20, tanba ne’e MP akuza arguidu sira ba pratika krime Dezobediénsia ne’ebé previstu iha artigu 244 hosi kódigu penál TL.

Audiénsia julgamentu prezide hosi juis singulár Maria Solana, MP reprezenta hosi Prokuradór Ricardo Leite no arguidu sira hetan asisténsia legál hosi Defensór Públiku Nelson Borges.

Jornalista: Carmelita Isaac