Hatutan.com, (25 Maiu 2022), Díli-Sidadaun sira kontinua forma naruk no hobur iha resintu edifísiu Konservatóriu bá Servisu Rejistu  Notariadu Munisípiu Díli  (KSRND) atu bele trata sira-nia dokumentu hanesan Sertidaun Batizmu RDTL,  Sertidaun Kazamentu RDTL, Sertidaun Óbitu RDTL no Billete Identidade (BI).  

Lee Mós : Abitante Sira Forma Naruk no Hein Kleur Trata BI ho Sertidaun RDTL

Sidadaun sira kontinua forma no sena-malu iha edifísiu Notariadu Dili. Foto/Hatutan.com

Tuir observasaun Hatutan.com nian  iha edifísiu KSRND  iha Caovili, Díli, Kuarta dadeer (25/05/2022), hatudu katak sidadaun sira ne’ebé bá trata sira-nia dokumentu relevante kontinua sena-malu, forma naruk tanba KSRND hasai ona regra katak loron ida sira bele trata de’it dokumentu bá ema 100.

Informasaun seluk ne’ebé, Hatutan.com asesu hosi sidadaun balu hato’o katak, sidadaun sira ne’e balu iha tuku 04:00 dadeer de’it bá forma  ona hodi hein ekipa tékniku sira atu bele hetan  atendimentu. Maske nun’ee, Hatutan.com halo entrevista ho sidadaun sira-ne’e maibé sira lakohi fó entrevista.

Hatutan.com mós tenta  halo aproximasaun hodi konfirma ho Diretora Konservatóriu ba Servisu Rejistu Notariadu Díli, Alda Maria José Pereira Soares da Silva, iha duni kna’ar fatin, maibé rejeita fó komentáriu, tanba okupadu ho servisu seluk.

Husi sorin seluk, Parlamentu Nasionál (PN), liuhosi bankada Partidu Demokrátiku (PD), ho FRENTI-Mudança, husu bá Governu, liu-liu Ministériu Justisa, tenke hadi’a sistema atendimentu bá públiku, iha Notariadu sira, no tau osan hodi aselera hadi’a mákina sira ne’ebé mak sei avaria ka aat.

Deputada hosi Bankada FRENTI-Mudança, Isabel Ximenes, hateten, Governu liu-liu Ministériu Administrasaun Estatál (MAE), Ministériu Justisa (MJ), inklui ministériu relevante sira, iha obrigasaun atu hadi’a sistema atendimentu públiku bá sidadaun sira.

La’ós ne’e de’it, Governu mós iha obrigasaun atu tau osan hodi halo manutensaun bá mákina sira ne’ebé mak iha informasaun katak, oras ne’e avaria ka aat.

Sidadaun sira kontinua forma no sena-malu iha edifísiu Notariadu Dili. Foto/Hatutan.com

Deputada Isabel dehan, iha Orsamentu Jerál Estadu (OJE) 2022 nian, Governu aloka ho montante ne’ebé boot teb-tebes, nune’e mós ho orsamentu retifikativu nian. Tanba ne’e, laiha razaun bá Governu atu labele halo prosesu aprovizionamentu ida ne’ebé mak ho urjénsia.

“Mais, kestaun importante boot liu mak ha’u haree iha semana rua kotuk mós, ha’u ko’alia iha parlamentu kona-bá sistema atendimentu bá iha prosesu trata BI ne’e rasik. Ha’u mós to’o duni ba iha lokál, altura ne’e haree iha Caicoli ne’ebá ne’e, ita haree laiha atendimentu ida ne’ebé mak umanu bá  ita nia sidadaun sira,” Deputada Isabel Ximenes hateten ba Hatutan.com iha PN.

Deputada FRENTI-Mudansa ne’e, fiar katak, Governu tenke ho sériu hodi hadi’a sistema atendimentu, liu-liu habadak burokrasia bá atendimentu nian. Bainhira sidadaun sira tama iha liña ida atendimentu ninian, ekipa tékniku sira tenke aselera, hodi labele halo demora bá iha prosesu sira-ne’e.

“Tanba ita-nia sidadaun sira, presiza sira-nia identidade, tanba billete de identidade ne’e, importante para kaer nu’udár ita nia provas, hanesan sidadaun Timor nian,” deputada Isabel fó hanoin.

Iha fatin hanesan, Deputadu husi Bankada Partidu Demokrátiku (PD), António da Conceição “Kalohan” dehan, orsamentu sira bá hadi’a ekipamentu ka mákina prodús dokumentu bá sidadaun sira ne’e, tama iha kategoria ida kapitál menór nian.

Deputadu António “Kalohan”. Foto/Hatutan.com

“Agora, ministériu sira, karik maka tenke  iha responsabilidade ida atu planu bá kapitál menór ne’e rasik. Sé bainhira sira ko’alia kapitál menór ne’e maka sira mós la espesífika katak, kapitál menór ne’e bá buat sira la’ós printer ninian ne’ebé maka baibain sira uza bá komputadór ne’e, mais ida-ne’e, ligadu bá servisu sira ne’ebé maka atendimentu públiku nian ne’e, ha’u hanoin, bele,” Deputadu António da Conceição “Kalohan” hateten tán.

Nia hatutan, iha tinan sira nia laran ne’e, buat ne’ebé Governu presiza tebes atu halo maka, konserva ekipamentu sira, tanba importante bá atendimentu povu ninian.

Sidadaun sira presiza tebes dokumentu sira hanesan kartaun eleitorál, BI, Sertidaun RDTL, Pasaporte, tanba serve bá buat ne’ebé komún ninian.

Deputadu hosi bankada opozisaun ne’e fiar katak, ho ezekusaun orsamentu iha OJE 2022 nian ne’ebé sei la’o to’o iha fulan-dezembru ne’e, parte ministériu relevante sira, bele hadi’a no sosa ekipamentu sira ne’ebé mak povu presiza tebes, no liu-liu mós tanba iha 2023, nu’udár bá eleisaun.

Ho situasaun ne’e, Deputadu António Kalohan konsidera katak, problema ne’e mosu, la’ós de’it iha parte atendimentu nian, maibé kapasidade ida sira nian atu haree dehan katak, fornesedór bá sasán sira ne’e mai hosi ne’ebé.

“Sé mai hosi Indonézia, tenke bá lori hosi ne’ebá. Covid-19 hotu tiha ona, uluk ne’e, ita dehan laiha ne’e, tanba sasán labele tama. Agora, sasán ba mai tiha ona, inisiativa mak karik laiha,” hateten Deputadu António Kalohan.

Jornalista: Rogério Pereira Cárceres