Hatutan.com, (27 Maiu 2022), Díli- Grand Dragon Lotaria loke tan nia ramu bá komérsiu iha munisípiu haat, hanesan Lautem, Liquiça, Baucau no Manatuto, hodi lori jogu lotaria ne’e besik liu bá povu.

Lee Mós : Mário Freitas Alves Manan Prémiu Motór husi Lotaria Grand Dragon

Grand Dragon Lotaria loke tan nia ramu iha Munisípiu Lautem, Liquiça, Baucau no Manatuto. Foto/Hatutan.com

Molok halo estabelesimentu Grand Dragon Lotaria  iha munisípiu, ekipa husi Grand Dragon Lotaria  nasionál halo uluk verifikasaun bá fatin no servisu hamutuk ho Munisipal Partner (MP) hodi halo verifikasaun bá terrenu, hadi’a edifísiu no monta ekipamentu Grand Dragon Lotaria  atu bele halo atendimentu bá kliente sira.

Hafoin halo instalasaun bá ekipamentu ekipa Grand Dragon Lotaria  nasionál halo fó mós formasaun bá iha pesoál marketing no staff sira husi kada munisípiu atu bele hafasil sira-nia servisu iha terrenu atende kliente sira.

CEO Graand Dragon Lotaria, Datuk Harry NG, via zoom konferénsia hateten, Grand Dragon Lotaria hahú loke tan atividade iha munisípiu ho parseiru sira husi munisípiu ne’ebé hanaran Munisipal Partner ne’ebé nia grau as liu husi master ajénsia no ajénsia sira ne’ebé Grand Dragon Lotaria iha.

Nia afirma atu hafasil servisu Munisipál Partner ka parseiru munisipál sira-nia servisu, Grand Dragon Lotaria sentrál ne’ebé lokaliza iha Díli, oferese treinamentu ba partisipante sira husi munisípiu atu sira rasik bele jere no halo sira-nia atividade iha munisipiu ho di’ak.

“Ho dijitalizasaun ne’ebé Grand Dragon Lotaria iha ita fasil loos atu fó servisu no halo atendimentu ba kliente sira tamba ne’e ba oin ita sei esforsu atu kliente no parseria sira satisfás ho ita-nia produtu,” Datuk Harry NG hateten ba partisipante sira iha edifísiu sentrál Grand Dragon Lotaria, Dili,  Sesta (27/05/2022).

Grand Dragon Lotaria ofisializa ezistensia iha Munisípiu Baucau, Manatuto, Liquiça no Lautem. Foto/Hatutan.com

Iha fatin hanesan Inspetór Ivonio José hateten ho formasaun ne’ebé Grand Dragon Lotaria halo bá nia staff sira ne’ebé destakadu iha munisípiu hatudu progresu di’ak no bele fasilita traballadór sira halo atendimentu di’ak bá kliente sira.

Inspetór ne’e afirma ho dijitalizasaun ne’ebé Grand Dragon Lotaria  hafasil servisu Inspesaun Jeral Jogu no parte seguransa nian bele halo kontrolu bá atividade ne’ebé Grand Dragon Lotaria.

“Ami iha ona koñesimentu bá atividade ne’ebé Grand Dragon Lotaria sei halo iha Munisípiu Baucau, Liquiça, Manatuto no Lautem,” Ivonio José hateten.

Jerente Grand Dragon Lotaria Munisípiu Liquiça, Valerio Martins dos Santos, agradese bá empreza Grand Dragon Lotaria ne’ebé fó ona oportunidade bá sira husi munisípiu hat atu bele sai hanesan parseria.

 “Ha’u hanoin ho prezensa Grand Dragon Lotaria bele ajuda munisípiu sira iha reseita rasik no ajuda loke mós kampu servisu ba joven sira iha munisípiu,” Valerio Martins dos Santos hateten.

Jornalista: Vito Salvador