Hatutan.com (31 Maiu 2022), Díli—Ró Berlin Ramelau hahú halo operasaun iha loron 30 fulan ne’e, hodi arranka ba Rejiaun Administrativa Espesiál Oecusse Ambeno (RAEOA) ho tripulante Timoroan, hafoin hetan asidente soke iha portu Mahata.

Ró Berlin Ramelau. Foto/Hatutan.com.

“Operasaun ró foin hahú horisehik ba Oecuse. Ne’e faz parte hosi solusaun ne’ebé tenki foti imediata. Maibé nafatin kontinua ho tripulante Timoroan ne’ebé antes ne’e lori ró ne’e maski iha difikuldade tanba ema la perfeitu liu-liu iha operasaun tanba kompleta ho ekipamentu dizitalizasaun modernu no ho kapasidade limitadu. Maibé kontinua fó oportunidade no ida-ne’e situasaun real mak halo ró soke,” Ministru do Transporte e Comunicações José Agostinho hateten iha Pal’asiu Governu, Tersa (31/05/2022).

Lee Mós: Durante Operasaun, Ró Berlin Ramelau “Xoke” Dala-rua

Tanba ne’e, iha mós tékniku espesialista na’in-rua hosi Komponente Nav’al ne’ebé fó apoiu operasionalizaun ba  ró ne’e durante movimentu iha tasi laran.

Advertisement

Governante ne’e garante katak, iha ninia operasaun bele la’o di’ak nafatin maski iha ona esperiénsia katak ró ne’e hetan asidente ona ho tripulante Timoroan, maibé nafatin fó konfiansa hodi halo jestaun.

Iha futuru presiza fasilita formasaun ba joven sira hodi hasa’e abilidade, kapasidade tékniku hodi prodús tripulante ne’ebé profissionál hodi jere Timor nia ró rasik la ho apoiu hosi nasaun seluk.

Jornalista: Carmelita Isaac

Advertisement