Hatutan.com (01 Juñu 2022), Díli—Adezaun Timor-Leste (TL) nian ba iha Organizasaun Mundiál Komérsiu (OMK), sei deside iha fulan Fevereiru 2023.

Ministru Koordenadór Asuntu Ekonómiku, Joaquim Amaral. Foto/Hatutan.com

“Ita hela de’it ona enkontru ba servisu rua de’it atu bele deside ona ba iha Fevereiru 2023, nune’e bele deside ona iha Konsellu Jerál, oinsa TL  sai membru ona ka la’e,” Ministru Koordenadór Asuntu Ekonómiku (MKAE), Joaquim Amarál hateten iha Salaun Ministériu Negósiu Estranjeiru no Kooperasaun (MNEK), Praia dos Coqueiros Díli, Tersa (31/05/2022).

Lee Mós: TL Hetan Ona Pasu Pozitivu atu Adere ba OMK

Prosesu adezaun TL ba OMK ne’e polítika Estadu RDTL nian no governu konstitusionál da-ualu ne’ebé  lidera hosi Primeiru ministru (PM) Taur Matan Ruak.  

Advertisement

Xefe Governu ne’e hatun ona despaixu atu kontinua prosesu adezaun, hahú kedan hosi governu anteriór ninian no agora prosesu ne’e la’o hela ho nia ekipa tékniku kompostu hosi ema na’in 17, instituisaun governu nian ne’ebé hanesan xáve ba iha prosesu ne’e. Maibé, sira seluk mós sei envolve hotu, tanba ligasaun komérsiu ne’e iha área hotu-hotu.

Sekretariadu OMK fó ona kritériu sira adezaun nian, no TL halo hela preparasaun hodi prinxe tuir indikativu sira tanba prosesu ne’e iha negosiasaun bens no servisu no mós propriedade intelektuál.

“Enkontru komisaun interministerial ba TL ninia adezaun iha OMK kompostu hosi ministru na’in-sia, Sekretária Estadu na’in-rua ho ekipa tékniku sira mai hosi ajénsia sia. Ajenda importante ohin atu halo atualizasaun ba iha membru komisaun interministerial sira, nune’e mós membru komisaun interministerial sira, iha oportunidade halo apresizasaun ba iha dokumentu TL  ninia oferta ba asesu merkadu, ba beins nomos ba iha servisus,” nia hateten.

Dokumentu ne’e sei lori ba atu hetan apresiasaun hosi Konsellu Ministru, tanba ne’e maka komisaun interministerial ne’ebé ninia pontu fokál sira entergra ona iha ekipa tékniku, iha semana hirak kotuk no sira konsege reuni, prepara, finaliza ona dokumentu TL ninia oferta asesu ba merkadu.

Tanba ne’e maka dokumentu ne’e ohin lori mai hetan apresiasaun, antes de haruka ba halo apresiasaun iha Konsellu ministru.

Advertisement

Rekezitu adezaun nian mak hanesan, iha nível bilaterál, sé Estadu membru sira ne’ebé interese ba merkadu, TL halo negosiasaun ho sira.

Bainhira TL iha konkordánsia ba iha item ne’ebé aseita ona, entaun TL  bele avansa ba iha asina akordu, no mós iha nível bilateral no plurilaterál.

Tanba ne’e maka prosesu sira ne’e hotu tenke hatama iha relatóriu iha kada reuniaun grupu de traballu, tenke relata faze no prosesu ne’ebé mak iha ona.

Jornalista: Rogério Pereira Cárceres

Advertisement