Haturan.com, (31 Maiu 2022),Díli- Prezidente Repúblika (PR), José Manuel Ramos-Horta, husu embaixadór timoroan sira ne’ebé reprezenta Timor-Leste  iha liur atu servisu maka’as hodi dada investór estranjeiru mai Timor-Leste.

Ministra Negosia Estranjeiru no Kooperasaun (MNEK), Adaljiza Magno. Foto/Hatutan.com

Ministra Negosia Estranjeiru no Kooperasaun (MNEK), Adaljiza Magno hateten, embaixador sira ne’ebe reprezenta Timor-Leste iha nasaun seluk, oras ne’e, halibur malu iha Timor-Leste hodi partsipa iha reuniaun koordenasaun ne’ebé MNEK mak organiza no baibain hanaran retiru koordenasaun no aproveita oportunidade ne’e lori embaixadór sira Timor-Leste ne’ebé rezidentes iha nasaun li’ur mai kumprimenta Prezidente Repúblika hodi simu orientasaun diplomata no planu estratejiku sira atu nune’e kontinua halao misaun iha diaspora hodi atrai investidores sira mai Timor-Leste.

“Ami ko’alia kona-bá tópiku prinsipál reuniaun koordenasaun nian, liuliu oinsá papel husi embaixadór sira hodi atrai investidores no ajuda Governu halo rekuperasaun ekonómika no mós diversifikasaun ekonómika,” Ministra Adaljiza Magno hateten.

Prezidente Repúblika, konkorda ho politika ne’ebé iha no fó mensajen atu embaixadór sira servisu ho didiak no nafatin iha korajen atu halo servisu ho dignu hodi hamorin Timo- Leste nia naran iha mundu.

Aproveita biban ne’e, Ministra Adaljiza informa mós bá PR kona-bá vizita Ministru Negósiu Estranjeiru Xina, Wang Yi ne’ebé sei vizita Timor-Leste iha loron 03 to’o loron 04 fulan-Juñu.

Oras ne’e,  Timor-Leste estabelese ona nia embaixada iha nasaun hamutuk 28 iha mundu.

Jornalista: Vito Salvador