Hatutan.com, (08 Juñu 2022), Díli-Governu liuhosi Ministériu Finansas (MF), oras ne’e, diskute no buka hela solusaun oinsá mak bele rezolve karreta “sukata” sira ne’ebé importa husi Austrália mai Timor-Leste.

Lee Mós : Tentativa, Liberta Karreta “Sukata” Sira husi Portu Díli

PNSIK tau fita polísia ka Police Line bá karreta “sukata” sir ne’ebé importa husi Asutrália. Foto/Hatutan.com

Ministru Prezidénsia Konsellu Ministru (MPKM), Fidelis Manuel Leite Magalhães, informa, asuntu ida-ne’e  to’o ona iha atensaun Governu nian no Ministru Finansas, Rui Augusto Gomes, sei iha hela faze diskusaun sira, atu haree oinsá bele responde ba situasaun ida-ne’e.

“Mais ida-ne’e hanesan sira foti fali buat ka pesa sira ne’ebé mak rahun, mai monta fali, depois fa’an fila-fali,” Ministru Prezidénsia Konsellu Ministru (MPKM), Fidelis Manuel Leite Magalhães, informa hodi responde Hatutan.com iha Palásiu Governu, Díli, Kuarta (08/06/2022).

Advertisement

Ministru Fidelis hatutan, prátika sira kona-bá importasaun karreta “sukata” sira, la’ós deit akontese iha TL, maibé akontese mós iha fatin barak, ka nasaun sira seluk.

“Kona-bá ninia detalla, resposta Governu nian ne’e, sei hatuur tuir medida sira ne’ebé mak Governu sei foti, hafoin  MF halo análize kle’an kona-bá aspetu sira hotu, bá situasaun ida-ne’e,” Fidelis Leite Magalhãs hateten.

Lee Mós : TL Atu Sai Fali Ona Fatin Lixu Bá Karreta “Sukata” Husi Austrália

PNSIK Halo Ona “Apreensaun”

PNSIK dada hela fita polísia ka Police Line bá karreta “sukata” sira ne’ebé importa husi Austrália. Foto/Hatutan.com

Polísia Nasionál Timor-Leste (PNTL), liuhosi unidade Polísia Nasionál Investigasaun Kriminál (PNSIK), Kuarta (08/06/2022), halo medida “apreensaun” hodi dada fita polísia nian ka Police Line  bá karreta “sukata” 131 ne’ebé importa Austrália no estasiona hela iha arredores Portu Díli.

Iha dekretu lei númeru 30/2022, loron 20 fulan-Juñu, hateten katak, karreta ne’ebé importadu, ninia kondisaun tenke seguru bá ema nia vida. Maibé, realidade hatudu katak karreta 131 importa husi Austrália mesak “sukata” no la seguru bá ema nia vida.

Advertisement

Ho razaun hirak ida ne’e maka, Komandu PNTL, liuhosi unidade PNSIK, hola kedan medida sira polisiál nian, hodi halo atuasaun iha terrenu, liuhosi dada fita polísia nian ka  “police line” bá karreta sira ne’e iha Portu Díli.

Informasaun seluk ne’ebé Hatutan.com rekolla husi fonte oioin iha terrenu katak, karreta sira ne’e, sei submete hotu bá  investigasaun polísia nian, inklui Ministériu Finansas (MF), hafoin foti desizaun ruma katak, karreta sira ne’e, atu devolve fali bá na’in ka MF liuhosi Diresaun Nasionál Patrimóniu Estadu (DNPE) mak loke prosesu leilaun.

Jornalista: Vito Salvadór/Rogério Pereira Cárceres        

Advertisement