Hatutan.com (15 Juñu 2022), Díli—Durante ezisténsia Sekretariadu Tékniku Fundo de Desenvolvimento do Capital Humano (FDCH) iha tinan 2011, to’o tinan 2022 konsege fó ona apoiu orsamentu millaun $300 ba bolseiru 7.000-resin ne’ebé hala’o estudu iha nasaun sira Azia no Europa inklui iha Universidade sira iha Timor Leste (TL).

Hosi númeru bolseiru hirak ne’e foin na’in 3.000 mak hetan ona servisu iha rai laran liuliu iha instituisaun Estadu sira.

Lee Mós: Governu Apoia $31.233 ba Bolseiru iha Área Aviasaun

Advertisement

“FDCH moris ho objetivu atu reforsa rekursu umanu iha TL. Tanba ne’e, hahú iha 2011 ate agora ami fó ona apoiu orsamentu ho total millaun $300 ba bolsu estudu, no formasaun profisionál ba Timor oan hamutuk 7.000-resin hodi ba halo estudu iha Indonészia, Malázia, Thailándia, Filipina, Portugál, Inglatera, Amérika, Brazil, Cuba, Austrália inklui universidade iha TL,” Diretór FDCH, Cristovão dos Reis hateten ba Hatutan.com iha Aeroportu Comoro, Kuarta (15/06/2022).

Bolseiru hirak ne’e hala’o estdu iha área Siénsia Sosiais no naturais, hosi númeru ne’e sira ne’ebé gradua ona hamutuk 4.000, sei ativu 3.000, maib’e 3.000 maka servisu ona iha instituisaun Estadu no sira seluk seidauk, tanba sei hala’o estájiu profisionál iha liñas Ministeriais, NGO, Empreza no instituisaun Estadu.

Bolsu estudu ne’e ho forma oin-oin mak hanesan bolsa kompleta, bolsa parsiál no subsídiu, maibé ba bolsa parsiál no kompleta valor ne’ebé estudante tenki hetan durante periúdu hala’o estudu iha área siénsia sosiais mak 3,0 no siénsia naturais 2,75.

Tanba, depois de FDCH oferese bolsu estudu, FDCH mós sempre halo monitorizasaun ba estudante sira no bainhira valór iha universidade la prienxe kritéria ne’ebé iha maka FDCH sei esklui hosi bolsu estudu.

Bazeia ba monitorizasaun ne’ebé FDCH halo ona ba bolseiru sira iha Indonézia hamutuk na’in 53 hatudu katak, sira nia valór prienxe kritéria ne’ebé FDCH estabelese.

Advertisement

Jornalista: Carmelita Isaac