Hatutan.com (15 Juñu 2022), Díli—Governu Timor-Leste liu husi Fundo de Desenvolvimento do Capital Humano (FDCH), servisu hamutuk ho Administrasaun Aeroportu no Navegasaun Aérea Timor-Leste Empreza Públika (ANATL,EP) apoia osan ho montante $31.233, hodi oferese bolsu estudu ba Timor-oan na’in-ne’en ba estuda iha Indonézia iha área aviasaun.

Prezidente Konsellu Administrasaun ANATL,EP, José Trindade da Cruz Pinto hala’o konferénsia Imprensa iha Aeroportu, Comoro, Kuarta (15/06/2022). Foto Hatutan.com.

Konkursu ne’e rasik sei loke hahú aban ho kritéria ema Timor-oan, hatene ko’alia no rona iha lian Inglés no idade másimu tinan 20.

“Bainhira pasa ona iha teste maka sira na’in-ne’en ne’e sei ba hala’o estudu dipoloma tolu iha área Gestão do Aeroporto ema na’in-rua, Airport Operation ema na’in-rua no Bombeiros do Aeroporto ema na’in-rua. Sira sei ba halo estudu iha Univesidade rua iha Indonézia mak hanesan Universitas Politeknik Penerbangan Surabaya no Sekolah Tingi Penerbangan Indonesia (STPI),” Prezidente Konsellu Administrasaun ANATL,EP,  José Trindade da Cruz Pinto hateten liu hosi konferénsia imprensa iha Aeroportu, Comoro, Kuarta (15/06/2022).

Utilizasaun rekursu ba bolseiru na’in-neen ne’e, antes ba eskola iha ona kontratu entre bolseiru no ANATL, katak bainhira tinan rua remata estudu mak sira tenki kontribui ba servisu ANATL no obrigatóriu sai funsionáriu ANATL, maibé bainhira lakohi maka tenki devolve hikas osan Estadu.

Advertisement

Diretór FDCH, Cristovão dos Reis hateten ezisténsia FDCH ho objetivu atu reforsa rekursu umanu iha Timor Leste liu-liu instituisaun Estadu ne’ebé presiza rekursu humanu.

Tanba ne’e, nia husu ba joven sira atu aproveita oportunidade ida-ne’e hodi konkorre iha bolsu estudu refere.

Totál bolseiru ne’ebé FDCH oferese ona ba ANATL hahú iha tinan 2019 to’o 2022 hamutuk na’in 12 no na’in-ne’en seluk ne’ebé antes ne’e hala’o estudu iha Indonézia, sei gradua iha fulan Setembru.

Jornalista: Carmelita Isaac

Advertisement