Hatutan.com, (15 Juñu 2022), Díli-Serviço Nacional de Inteligência (SNI) rekolla ona objetivu ka materiál sira funu nian hamutuk 134 hosi komunidade sira iha territóriu nasionál.

SNI rekolla objetu funu husi komunidade sira iha teritóriu nasionál. Foto/Hatutan.com

Objetu  funu nian  sira ne’ebé SNI rekolla mak hanesan, kilat rakitan lolon-rua  (2), Pistola rakitan (1), Munisaun (peloru) pistola nian hamutuk 12, Munisaun bá kilat ho marka SKS iha  ida (1), Munisaun M-16 (49), Munisaun AR-15 (5), Munisaun SP (20), Munisaun bá kilat Mauzer (12), Émbolku mamuk (2), Bazuka musan lima (5), Morteiru boot iha 12, Moteiru ki’ik iha  neen (6), Granada iha haat (4), Rádiu HT hamutuk tolu (3).

“Materiál explozivu sira ne’e, ita rekolla hosi fatin, maibé mai ho tipu ne’ebé diferente hotu, hosi bazuka nia musan, mai to’o iha dila grama, munisoins, granada, no mós ho armas rakitan sira,” informa autoridade SNI nian bá Hatutan.com iha sira-nia kna’ar fatin, Caicoli, Díli, kuarta (14/06/2022).

Polítika VIII Governu nian liuhosi Gabinete Primeiru-Ministru (PM), Taur Matan Ruak, prevee orsamentu liuhosi Servisu Nasionál Intelijénsia, atu oinsá bele kontinua rekolla sasán explozivu sira ne’ebé maka bele fó ameasa ba ema nia vida, no ameasa mós ba iha estabilidade seguransa nasionál.

Advertisement

Primeiru-Ministru (PM), Taur Matan Ruak, fó orientasaun bá SNI para oinsá bele uza meius hothotu, rekursu ne’ebé mak iha, para kontinua rekolla armas sira ne’e.

Haree hosi li’ur, objetu sira funu nian ne’e, maioria mak kondisaun ferrujen ka aat ona. Maibé bazeia ba observasaun téknika hosi Unidade Espesiál ba Polísia (UEP), Seksaun EOD nian katak, material  funu sira-ne’e, kontein ho material kímiku ne’ebé forte, no iha posibilidade bele hamate ema bainhira laiha kontrolu.

Objetu funu nian ne’ebé SNI rekolla husi komunidade sira iha teritóriu nasionál. Foto/Hatutan.com

Iha Kinta (15/06/2022), tuku 10:00 Otl, SNI entrega ona bá PNTL, liuhosi Unidade Espesiál Polísia, Sesaun Explosive Ordnsnce Disposal (EOD), transporta  materiál funu nian ne’e bá halo destruisaun iha área Kaitehu, Suku Ulmera, Postu Administrativu Bazartete, Munisípiu Liquiça.

SNI apela  bá sidadaun sira hotu  ne’ebé agora daudaun kontinua rai arma ka kilat no sasán explozivu sira ne’ebé bele fó ameasa bá ema nia vida no seguransa nasionál, atu bele entrega hotu bá autoridade relevante ho meiu saida de’it, hodi nune’e bele halo destruisaun tuir ninia regra legál ne’ebé vigora iha TL.

SNI kontinua utiliza nia fonte sekreta sira bá halo aproximasaun persuazivu, hodi rekolla arma ka kilat sira ne’e. Bainhira arma sira ne’e iha ona, SNI identifika, no koordena ho instituisaun sira relevante hanesan PNTL hodi rekolla materiál explozivu sira.   

Jornalista: Rogério Pereira Cárceres

Advertisement