Hatutan.com, (08 Juñu 2022), Díli-Ekipa konjunta kompostu husi Servisu Alfándega,  Servisu Nasionál Informasaun (SNI), Polísia Nasionál Servisu Investigasaun Kriminál (PNSIK) ho ekipa intelijénsia FALINTIL-Forsa Defeza Timor Leste (J2) asegura hela karreta “sukata” lubun ne’ebé importa husi Austrália iha Portu Díli atu la bele sai husi arredores Portu Díli.

Lee Mós : TL Atu Sai Fali Ona Fatin Lixu Bá Karreta “Sukata” Husi Austrália

Karreta “sukata” ne’ebé ema balun hamutuk ho importadór sira tenta lori sai husi Portu Díli. Nune’e, PNSIK ho autoridade relevante sira bá dada hikas hodi lori mai estasiona iha arredores PNSIK, Caicoli, Díli. Foto/Hatutan.com

Tuir informasaun ne’ebé Hatutan.com asesu husi fonte sira Alfándega nian katak karreta “sukata” sira-ne’e maioria hetan asidente tráfiku iha Austrália no tuir Lei Tránzitu Rodoviáriu Austrália nian, katak karreta ho kondisaun “sukata” sira-ne’e la autoriza ona atu halo operasaun no tenke soe bá lixu.   Maibé importadór  balun, liuliu hirak ne’ebé halo atividade sosa no fa’an karreta ka fó aluga karreta bá sosa fali karreta “sukata” sira-ne’e hodi lori mai atu hadi’a iha Timor no fa’an bá timoroan sira iha merkadu Timor.

Iha Segunda (06/06/2022), parte sira nu’udár importadór hamutuk ho autoridade balun bá  liberta tiha karreta “sukata” hamutuk haat (4) iha Portu Díli bá iha fatin fa’an karreta ida iha área Fatuhada, Díli. Maibé, loron tuir mai, Tersa (07/06/2022), parte ekipa konjunta, liuliu Servisu Nasionál Informasaun (SNI), Polísia Nasionál Servisu Investigasaun Kriminál (PNSIK) ho ekipa intelijénsia FALINTIL-Forsa Defeza Timor Leste  (J2) lalais kedas halo atuasaun hodi foti “obrigatóriu” karreta “sukata” hirak-ne’e hodi lori bá estasiona iha arredores PNSIK, Caicoli, Díli hodi submete bá investigasaun.

Karreta haat ne’ebé sai hanesan prova krime ne’e, kompostu husi karreta rua ho marka Mazda (ida kór mutin, ida kór malahuk), no karreta rua (2) seluk ho marka Triton (ida kór metan no ida ho kór mutin).

Hatutan.com tenta ona hodi konfirma asuntu ne’e ho Xefe Operasaun PNSIK, Inspetór Polísia, Mouzinho Correia, maibé  nia labele fó komentáriu, tanba relatóriu sira bá kazu ne’e, entrega hotu ona bá iha portavós Komandu Jerál PNTL, Superintendente Xefe Polísia, Armando Monteiro, hodi hein publikasaun.

Observasaun Hatutan.com iha terrenu nota katak, karreta sira ne’e, seidauk iha Xapa Matrikula, no bobar “metin” hela ho fita polísia nian “Police Line” iha resintu komandu jerál PNTL, Caicoli, Díli, hodi submete bá investigasaun.

PNSIK  Dada Fita “Police Line” bá Karreta “Sukata” iha Portu Díli

Iha Kuarta (08/06/2022), purvolta tuku 11:00 liu, ekipa PNSIK tuun diretamente bá terrenu iha Portu Díli hodi bá dada fita “Police Line” bá karreta “sukata” sira ne’ebé estasiona hela iha Portu Díli.

Tuir fontes  sira katak karreta “sukata” sira-ne’e  tenke arrola no la bele husik sai husi Portu Díli atu submete bá investigasaun tuir mai.  

Atuasaun PNSIK nian hodi bobar fita polísia nian ka police line bá karreta “sukata” importa husi Austrália ne’e, tanba konsidera karreta sira-ne’e la seguru bá ema nia vida, liu-liu viola dekretu lei númeru 30/2011, 27 de juñu, regula kona-bá seguransa bá ema nia vida. Karreta “sukata” sira ne’ebé PNSIK bobar “Police Line”  iha Portu Díli hamutuk 131.

 Perspetiva TANE Nian

Husi sorin seluk, TANE Konsumidór haree katak importasaun karreta haree ba tinan produsaun iha menus tinan lima (5) labele. Ezemplu importa karreta  ho tinan produsaun 2015 labele tama ona iha merkadu Timor-Leste tanba liu ona tinan-lima. Maibé kuandu karreta ka sasán “sukata” la haree bá tinan tanba la regula ida-ne´e, tanba karreta sira ne’ebé mak tinan-lima bá leten bele sai “sukata” no destroi hodi hatama konteiner haruka mai, tanba lei regula kona-bá “sukata”.

Prezidente  TANE Konsumidór, António Ramos da Silva “Naikoli” esplika katak impaktu husi importa karreta “sukata” ne’e prejudika  Direitu bá moris di’ak,  ne´e direitu konstitusionál ne´ebe proteje husi Lei INAN RDTL nian iha artigu 53º no Lei Protesaun ba Konsumidór sira nian, Lei Nº 8 tinan 2016, loron 08 fulan Jullu.

Moris di’ak katak, moris iha ambiente ne’ebé saudavel. Nune’e, tuir António “Naikoli” importasaun karreta  “sukata” husi Austrália ne´e prejudika ambiente ne’ebé prejudika bá konsumidór sira-ninia moris di’ak.

Tuir perspetiva TANE Konsumidór nian katak, haree iha auzénsia lejizlasaun, tanba oportunidade atu entidade envolvente sira no stackholder sira tuur-hamutuk hodi prepara diploma lejizlasaun hodi regula, tanba diploma bá regula importasaun veíkulu ho ninia tinan-lima (5) mai kraik, maibé la ko’alia kona-bá kondisaun karreta  “sukata”.

TANE Konsumidór rekomenda atu prepara diploma ruma tenke rona entidade hotu-hotu ne’ebé relevante hanesan Ambiente, saúde, komérsiu, asosiasaun importadór no veíkulu sira nian, emprezáriu sira no mós asosiasaun defeza konsumidór sira nian. Atu nune’e, aprova diploma ne´ebé bele kontempla pozisaun entidade hotu-hotu nian.

Lee Mós : “Pulaunya Besi Rongsokan”, Bisnis Mobil Bekas Menggeliat

Jornalista: Rogério Pereira Cárceres