Hatutan.com (21 Juñu 2022), Díli—Governu liuhosi Centro Nacional Chega!, Instituto Público (CNC,I.P), iha Tersa 21 juñu, hala’o konsiensializasaun ba membru sira iha instituisaun Polísia Nasionál Timor-Leste (PNTL), Unidade Polisia Marítima (UPM), atu evita repete aktu forsadu sira ne’ebé mak akontese iha pasadu hosi militár Indonéziu hasoru timoroan sira.

Centro Nacional Chega!, Instituto Público (CNC,I.P), hala’o konsiensializasaun ba membru sira iha instituisaun Polísia Nasionál Timor-Leste (PNTL), Unidade Polisia Marítima (UPM), atu evita repete aktu forsadu sira ne’ebé mak akontese iha pasadu hosi militár Indonéziu hasoru timoroan sira, Tersa (21/06/2022).

Diretór Relasaun Externa, Komunikasaun no Advokasia Centro Chega!,Gaudéncio de Sousa esplika, sosializasaun  ne’e atu responde ba papél Centro Nacionál Chega! nian ne’ebé mak haktuir iha rekomendasaun Chega!, no mós dekretu lei kona-bá CNC nia mandatu oinsá kontinua hala’o diseminasaun informasaun, kona-bá relatóriu Chega! nian no relatóriu Per Memoriam Ad Spem entre Timor-Leste ho Indonézia ba públiku.

Lee Mós: CNC ho Empreza Di’ak Sei Fó Formasaun no Hakbi’it Ekonomia Grupu Sobrevivente

“Objetivu prinsipál maka oinsá kontinua sosializa, fahe informasaun kona-bá relatóriu Chega! no relatóriu Per Memoriam Ad Spem. Ne’ebé CNC hanoin katak, rekomendasaun balun pertinente tebes mai iha parte instituisaun públiku sira, liu-liu hanesan Polísia, kona-bá oinsá halo reforma institusionál. Entaun, dalan ida ne’ebé ami halo maka fahe informasaun ba sira kona-bá saida mak akontese iha pasadu no saida mak parte polisia, hanesan instituisaun povu nian liu-liu pesoál sira labele repete saida mak aktus sira ne’ebé akontese iha ita nia ninia pasadu,” Gaudéncio de Sousa hateten iha kuartél UPM nian, iha Largo de Lecidere, Díli, Tersa (21/06/2022).

CNC mós informa kona-bá atividade sira ne’ebé CNC halo ona, relasiona ho akontesimentu sira iha pasadu no oinsá mak hetan kontribuisaun hosi entidade hotu-hotu, liu-liu ho programa “transmisaun memória” hosi CNC rasik.

Diretór Relasaun Externa, Komunikasaun no Advokasia Centro Chega!,Gaudéncio de Sousa.

“Oinsá mak identifika, ka karik iha maluk polisia sira ne’ebé mak uluk involve iha servisu klandestina ka, sira hanesan autór ida iha prosesu luta, sira bele kontribui hakerek fali sira nia memória pasada, atu nune’e sai hanesan referénsia mós ba peskizadór sira, no mós sai hanesan informasaun ba estudante sira liu-liu jerasaun foun sira ne’ebé mak moris depois de restaurasaun independénsia,” Gaudéncio de Sousa informa.

Sosializasaun ne’e bele akontese tanba iha kooperasaun interministeriál entre CNC ho Ministériu Interior (MI), inklui formasaun sira kona-bá Chega! no direitus Umanus nian, mak hala’o iha Centro Formação Policia (CFP) iha Akademia Comoro.

Iha fatin hanesan, Segundu Komandante UPM, Inspetór Xefe Polísia, Aniceto da Silva konsidera formasaun ne’e importante tebes ba sira liu-liu bele atualiza informasaun ba membru foun sira hodi hatene kona-bá istória Timor-Leste nian, iha akontesimentu pasadu hosi tinan 1974 to’o 1999.

“Diseminasaun informasaun kona-bá timor nia istória mai iha UPM nune’e membru tomak bele apár ho situasaun ida-ne’e. Tanba ita nia membru sira UPM ne’ebé mak ho idade nurak, sira ladún hatene, ladún koñese di’ak liu kona-bá istória timor hosi hahú to’o remata. Ho ida-ne’e maka, ami agradese ba Centro Chrega! nia atividade ida ne’e, tanba lori informasaun hirak ne’e mai iha unidade ida ne’e nune’e bele fahe tutan ba ita nia membru sira,” Inspetór Xefe Polísia Aniceto da Silva hateten.

Membru UPM ne’ebé partisipa iha sosializasaun ne’e na’in 40, maibé iha membru barak mak la konsege partisipa tanba destakadu iha Postu Seguransa UPM nian iha territóriu nasionál.

Jornalista: Rogério Pereira Cárceres