Hatutan.com, (23 Juñu 2022), Díli- Amilcan Fernandes, nu’udár kliente Lotaria Grand Dragon kontente uainhira nia númeru favoritu sai iha bola dahuluk 6D nian iha lotaria Grend Dragon.

Lee Mós : Mário Freitas Alves Manan Prémiu Motór husi Lotaria Grand Dragon

Amilcan Fernandes (hamriik iha klaran) nu’udá manan na’in premiu Lotaria Grand Dragon ho valor osan $100,000. Foto/Hatutan.com

Amilcar Fernandes bá jornalista sira iha edifísiu Empreza Red Star, Pantai Kelapa, Díli, Kinta (23/06/2022) hateten, númeru 567480 ne’ebé nia kona iha 6D lotaria Grand Dragon mai husi mehi tamba ne’e sente kontente  maibé seidauk iha planu atu utiliza osan ne’e bá saida.

Amilcar Fernandes kontente mós tamba Lotaria Grand Dragon nia sistema kapas uainhira kliente sira kona notifikasaun tama direita bá kliente sira liu husi mensajen automátiku bá numeru ne’ebé rejista ona iha ajénsia ho master ajénsia sira lotaria Grand Dragon nian.

“Iha istória dahuluk iha Timor katak lotaria ka SDSB ida hanesan empreza Red Star, Grand Dragon Lotaria uainhira ita-nia númeru kona sira mensajen mai rasik tama iha ita-nia númeru telemovel ne’ebé enxe iha mákina lotaria nian,” Amilcar Fernandes hateten.

Amilcar hatutan dala ruma sempre hola SDSB ka lotaria sira seluk maibé kona ladún boot no foin primeira vez nia ho $1.00 bele kona fali $100,000.00 tamba ne’e agradese bá Maromak, matebian no bá empreza Red Star ne’ebé oferese prémiu ne’e tamba husi ne’e nia bele hatutan nia moris.

Amilcan Fernandes. Foto/Hatutan.com

Iha fatin hanesan Diretór Ezekutivu Empreza Red Star Global Timor Lda, Maximiliano F. M. Piedade hateten, hanesan ema hotu hatene katak Lotaria Grand Dragon nia lema mak “Dolar ida mehi ida” no ohin loron kliente lotaria Grand Dragon konsege realiza dunik nia mehi liu husi Lotaria Grand Dragon no felizmente nia konsege hetan prémiu ho osan $100,000.

“Ami nia kliente ida ohin haksolok loos tamba nia bele realiza nia mehi ho dolar ida hodi manan prémiu 6D ho montante $100,000,” Maximiliano F. M. Piedade hateten.

Hafoin kliente ne’e kona empreza Red Star iha mós obrigasaun hodi selu tasa $10,000 bá Estadu no ajente ne’ebé fa’an Lotaria Grand Dragon iha direitu $5,000 husi empreza hanesan remunerasaun bá servisu ne’ebé nia presta.

Jornalista: Vito Salvador