Hatutan.com, (28 Juñu 2022), Díli-Projetu konstrusaun edifísiu “provizóriu” foun Rádiu Televizaun Timor-Leste, Empreza Públika (RTTL,E.P) sei gasta orsamentu millaun US$1-resin.

Lee Mós : CAC Identifika Projetu Instalasaun Set-top Box RTTL,E.P Fó Prejuízu Bá Estadu $682,261.00

Ministru MAPKOMS, Francisco Martins da Costa Pereira Jerónimo, asina kontratu ho diretór BANIR LEMA UNIP.LDA, Domingos Sequeira, ne’ebé mak sai vensedór bá konkursu públiku (tenderizasaun) obra konstrusaun edifísiu foun RTTL,E.P. Foto/Hatutan.com

Edifísiu “provizóriu” ho andár tolu;  medida naruk metru 30 no nia luan metru 15 ne’e, Tersa (28/06/2022),   Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ofisiálmente asina kontratu diretór BANIR LEMA UNIP.LDA, Domingos Sequeira, ne’ebé mak sai vensedór bá konkursu públiku (tenderizasaun) obra konstrusaun edifísiu foun RTTL,E.P nian ne’e.  

“Edifísiu ne’e provizóriu, nia kontextu ne’e para atu hala’o netik servisu ruma iha ne’e. Edifísiu permanente di’ak nian, la’ós edifísiu baibain ida, edifísiu ida para halo servisu provizóriu iha ne’e, hodi hein edifísiu foun ne’ebé mak aban bainrua sei halo iha Ai-mutin. Ida ne’e maka halo uluk ida ne’e, tanba sé la halo ida ne’e, ita boot sira RTTL atu bai ha ne’ebé. Ne’e fatin la di’ak hotu ona ne’e, udan mós sa’e mai, susar,” Ministru  Francisco Jerónimo hateten bá jornalista sira, hafoin selebra kontratu ho kompañia manán-na’in bá konstrusaun edifísiu foun RTTL,E.P ne’ebé hala’o  iha edifísiu RTTL, E.P, Caicoli, Díli.

Ministru Francisco Jerónimo haktuir, akontesimentu dezastre naturál (inundasaun) iha loron 04 fulan-Abríl 2021, rezulta edifísiu RTTL,E.P afetadu maka’as hosi bee-sa’e.

Situasaun ida-ne’e, MAPKOMS rasik mós tun direta observa iha terrenu, hodi husu mós ba prezidente RTTL,EP, José António Belo, atu halo relatóriu konkreta ida bá nia, nune’e oinsá mak iha futuru, bele harii edifísiu provizóriu ida, atu kondisiona nafatin funsionáriu sira ninia servisu.

MAPKOMS rekoñese katak, durante tinan barak nia laran, RTTL, E.P harii kedan hosi ukun-aan to’o mai oras ne’e, seidauk iha kondisaun estúdiu ne’ebé di’ak. Rádiu televizaun ne’ebé harii ikus, di’ak liu fali mídia ne’ebé mak Estadu nian rasik.

“Preokupasaun ne’e halo ha’u hanoin katak, ha’u mós hahú atu luta, para atu bele hetan projetu ida-ne’e, para ohin ne’e, ita bele asina akordu ne’e. La fasil, maibé presiza korajen nafatin atu halo servisu. Tanba ne’e mak ha’u ohin, ha’u hanoin katak, di’ak liu lais ona bá lansa. Tanba sé kleur liu fali, oras ida ema balu mai tán fali ho deskonfia ministru lakohi asina tán, ministru hakarak atu hetan osan ruma hosi projetu karik. Orsamentu um milhão itál dolláres ka $1,196,095.54,” MAPKOMS, Francisco Martins da Costa Pereira Jerónimo hateten.

MAPKOMS dehan, dala-ruma ema inventa liafuan, hakarak lori ema seluk ninia hanoin, hatama iha kakutak, hodi halo prosesu, halo buat ne’ebé deskonfia tun sa’e.

Ministru Francisco Martins da Costa Pereira Jerónimo foto hamutuk ho kargu xefia sira husi MAPKOMS foto hamutuk ho dirijente sira iha RTTL,E.P. Foto/Hatutan.com

“Labele hanoin atu halo má-fe de’it, presiza boa-fé, bá prosesu dezenvolvimentu konstrusaun Estadu ida ne’e. Presiza tebetebes no tenke iha boa-fé. Katak, ita hakarak servisu bá rai ida-ne’e, ita hakarak lori bá rai ida-ne’e bá oin, no ita hakarak katak RTTL,E.P ne’ebé maka empreza públika Estadu nian mós tenke iha kondisaun infraestrutura  ne’ebé mak di’ak, no tenke fornese notísia ne’ebé mak kualidade bá ita nia komunidade. Ida ne’e mak ita-nia hakarak,” Francisco Jerónimo afirma.

Ministru MAPKOMS esklarese katak selebrasaun kontratu bá harii edifísiu foun RTTL, E.P ne’e hanesan luta ida nasionál, tanba nia rasik mós hahú fali ona ho estudu viabilidade foun hodi konstrui futuru edifísiu foun bá RTTL, E.P ho Tatoli,I.P iha Ai-mutin, Díli.

Francisco Jerónimo dehan, edifísiu foun ne’ebé atu harii daudaun ne’e, provizóriu de’it, nune’e bele fasilita funsionáriu sira, no liu-liu jornalista RTTL, E.P atu iha konfortavel halo servisu, tanba iha tempu udan sempre akontese inundasaun.

Kona-bá edifísiu foun RTTL, E.P nian ne’ebé planeia atu harii tán iha Ai-mutin, presiza liuhosi estudu viabilidade. Tanba estudu ne’e konklui ona, no submete ona ba Comissão Nacional  de Aprovizionamento (CNA), hodi loke konkursu públiku.

MAPKOMS husu ba kompañia manán-na’in, BANIR LEMA UNIP.LDA atu aselera prosesu konstrusaun bá edifísiu ne’e, tanba durasaun tempu konstrusaun  durante fulan-neen (6) de’it.

Iha fatin hanesan, diretór BANIR LEMA UNIP.LDA,  Domingos Sequeira, garante katak, sei konklui konstrusaun foun bá edifísiu provizóriu RTTL, E.P iha fulan-neen nia laran tuir kontratu.

“Ha’u gante katak, hotu, tanba material hotu, ami order mai hotu hosi Indonézia, prepara hotu ona. Antes tama asina kontratu mós, ami nia badaen, hothotu kompletu ona. aban bá oin, ami komesa harii ona armazén iha ne’e, hotu ami book ona. Ha’u garante fulan neen bele hotu,” Domingos Sequeira promete.

Pesoál tékniku sira ne’ebé mak atu hala’o servisu bá iha konstrusaun edifísiu ne’e, parte kompañia kontrata hosi Indonézia, maibé ajudante sira mak timoroan.

Orsamentu ne’ebé utiliza bá konstrusaun edifísiu “provizóriu” RTTL,E.P ne’e, mai hosi Orsamentu Jerál Estadu (OJE) 2022 nian ne’ebé mak tama iha fundu infra-estrutura.

Jornalista: Rogério Pereira Cárceres