Hatutan.com, (24 Juñu 2022),Díli– Serviço de Registo e Verificação,  Institutu Públiku ((SERVE, I.P), to’o agora seidauk atribui lisensa bá ajénsia ka kompañia hodi halo rekrutamentu bá traballadór ka sidadaun timor sira atu bá servisu iha rai-li’ur.

Lee Mós : Traballadora Na’in-hitu “Abandona” iha Abudabi

Timoroan sira barak trata sira-nia pasaporte atu bele halo viajen bá rai-li’ur. Foto/Hatutan.com

Bazeia bá dekretu lei nu 34/2017 fó dalan bá kualkér atividade ka entidade hodi halo rekrutamentu, maibé ajénsia ne’ebé fó garantia bá timoroan hodi bá servisu iha rai-li’ur no enfrenta problema oioin la liu husi SERVE, I.P.

“SERVE, I.P halo verifikasaun eletrónika bá dadus hotu iha entidade ida ka rua ne’ebé halo ona rekrutamentu, maibé la tuir regra no lei ne’ebé vigora.  Empreza ka ajensia sira-ne’e  iha de’it lisensa viajen, signifika fa’an billete ka tiketi viajen no infelizmente seidauk iha lisensiamentu atu halo rekrutamentu traballadór timoroan bá rai-li’ur, tanba ne’e, lisensa viajen la hanesan ho lisensa rekrutamentu, tanba to’o agora SERVE seidauk simu pedidu husi ajénsia hodi halo lisensa rekrutamentu, Diretór SERVE, I.P, Florençio Sanches, informa hodi responde Hatutan.com iha nia servisu fatin, Díli, Sesta (24/06/2022).

Advertisement

Maske to’o agora SERVE, I.P seidauk simu ofisiálmente karta notifikasaun relasiona ho atribuisaun lisensa hirak ne’e, maibé SERVE mós iha kompeténsia atu haree  fali sistema eletróniku no fíziku ne’ebé iha katak entidade ne’ebé lori timoroan bá problema nia laran laiha lisensiamentu bá rekrutamentu.

Tuir prosedimentu ne’ebé iha katak bainhira atu rekruta timoroan sira áa servisu tenke submete pedidu bá SERVE, I.P no sei enkamiña bá SEFOPE ho MNEK maibé antes hatama pedidu tenke prienxe mós prosedimentu kona-bá atividade kompañia durante ne’e liga ho formasaun ne’ebé bele lori ema bá servisu. Tanba ne’e, SERVE, I.P husu bá kompañia ka entidade hotu katak atu rekruta ema presiza  buka hatene kona-bá lei ne’ebé vigora iha Timor liu-liu kona-bá lisensa rekrutamentu nune’e labele fó risku bá ema seluk.

Nia mós husu ba joven atu loke matan bá situasaun ne’ebé joven barak iha Portugal enfrenta problema, liu-liu antes trata dokumentu ho ajénsia balun presiza verifika ajénsia ne’e iha lisensa bá rekrutamentu ka lae.

Lee Mós : Ramos-Horta Husu Governu Lori Fila Traballadora Timoroan iha Abudabi

Jornalista : Carmelita Isaac

Advertisement