Hatutan.com, (25 Juñu 2022), Díli-Polísia Nasionál Timor-Leste, Unidade Patrullamentu Fronteira  (UPF) hamutuk ho Autoridade Aduaneira ka Alfándega ho Quarentena, Sábadu (25/06/2022), halo destruisaun liu hosi meius “sunu” manu-aman madena hamutuk sia (9) ne’ebé mak hatama ilegálmente hosi timoroan sira balun iha liña fronteira.

Lee Mós : Ministru Pedro Reis Lansa Importasaun Manu-Futu

Autoridade sira halo destroisaun ka sunu manu madena ne’ebé importa ilegalmente. Foto/Espesiál

Komandante UPF, Superintendente Euclides da Costa Belo, informa, manu madena hirak ne’e, hatama ilegálmente hosi timoroan sira balun liuhosi  área Mota-Ain, Suku Batugade, Postu-Administrativu Balibo, Munisípiu Bobonaro.

“Ba dahuluk ha’u hakarak agradese bá ekipa servisu integradu ne’ebé akompaña halo destruisaun bá manu-futu ilegál sira ne’e no sai mós sasin katak evidénsia sira ne’e ofisiálmente ita sunu ona, nune’e labele sai fali problema bá ita iha futuru, tanba ita hotu iha responsabilidade hanesan ekipa integradu iha ne’e atu asegura la’ós de’it ema, maibé mós fó atensaun bá protesaun moras seluk hosi animal ne’ebé bele prejudika saúde públika,” Komandante  Euclides da Costa Belo, hateten iha komunikadu imprensa ne’ebé Hatutan.com, asesu.

Euclides Belo husu bá sidadaun ne’ebé durante ne’e sempre halo importasaun bá kualkér tipu animal liu hosi dalan ilegál hosi fronteira, tenke assume sira-nia responsabilidade hodi hatán ba justisa.

“Hanesan ita hotu hatene, Ministériu Agrikultura no Peska, iha fulan-Dezembru, tinan kotuk, ofisiálmente halo ona lansamentu bá importasaun manu futu tipu Madena hosi Indonézia atu limite importasaun ilegál, hodi legaliza emprezáriu ne’ebé de’it bele hatama manu refere, maibé bainhira komunidade sira kontinua viola hodi hatama laiha) justifikasaun maka sei simu nia konsekuénsia,” Euclides Belo afirma.

La’ós ne’e de’it, Komandante UPF ne’e husu mós bá emprezáriu lokál sira atu labele utiliza fali komunidade iha área fronteira hodi atinje lukru ne’ebé boot bá sira-nia interese pesoál.

“Governu hala’o papél hanesan órgaun reguladór hodi fasilita importasaun, maibé PNTL mós ezije kooperasaun ba kompañia hodi hatama reseita ba kofre Estadu liuhosi dalan formál tuir lei Quarentena Timor-Leste nian, tanba ita lakohi manu sira ne’e nia finalidade bá fali komersiál ilegál nian,” Euclides Belo tenik.

Manu aman madena iha Timor-Leste sai hanesan manu favoritu bá ema hirak ne’ebé gosta futu-manu tanba manu ne’e “tebe” di’ak ka matador. Nune’e manu madena nia folin mós la’ós ki’ik.

Informasaun balun ne’ebé Hatutan.com asesu husi fontes  balun futu-manudor  sira hateten, manu aman madena ida bainhira fa’an iha manu-futu fatin bele liu $500 to’o $1000. Nune’e, bainhira futu mós bele taru entre $1000 to’o $2500.   

Jornalista: Rogério Pereira Cárceres