Hatutan.com, (28 Juñu 2022), Díli-Polísia Austrália liuhosi Timor-Leste Police Development Programe (TLPDP) iha Timor-Leste kontinua fó apoiu bá Polísia Nasionál Timor-Leste (PNTL) to’o 2027 ho programa prioridade sira hamutuk 14.

Lee Mós : Eskuadra PNTL Lima Iha Manatuto Laiha Karreta Operasionál

Komandu Jerál PNTL halo enkontru ho TLPDP iha Kuartél Jerál PNTL, Díli, Tersa (28/06/2022). Foto/Hatutan.com

Xefe Administrasaun no Planeamentu PNTL, Superintendente Calisto Gonzaga, hateten durante prezensa TLPDP nian iha TL iha 2001 apoia ona programa lubun ida bá membru PNTL sira, liuhosi kapasitasaun rekursu umanu, kona-bá formasaun bázika, avansadu no to’o formasaun espesializada.

“Ita atu halo kontinuasaun bá kooperasaun PNTL ho TLPDP, ne’ebé mak reprezenta Austrália. Iha programa lubuk ida ne’ebé mak sira ohin aprezenta bá ita katak, sira mantein nafatin atu apoiu PNTL to’o iha 2027,” Superintendente Calisto Gonzaga, hateten ba jornalista sira, hafoin diskusaun téknika entre estrutura Komandu Jerál PNTL ho reprezentante sira misaun TLPDP nian iha Salaun Kuartél Jerál  PNTL, Díli, Tersa (28/06/2022).

Programa 14 ne’e, sanak mai hosi programa importante haat mak hanesan, operasaun, formasaun, lojístika, ho infra-estrutura. Programa sira ne’e maka, fahe bá sub-programa hamutuk 14, hodi mantein no masimiza sira-nia apoiu bá PNTL to’o 2027.

Oras ne’e Austrália nia Polísia sira mós apoia hela formasaun bá rekursu superióra feto ida, maka Superintendente Xefe Polísia, Naterçia Gama, ne’ebé frekuente hela nia kursu kona-bá defeza iha Austrália.

Tuir planu, iha fulan oin, Komandu PNTL sei haruka tán superiór na’in-tolu, hodi ba tuir tán kursu ne’ebé hanesan, ho nivel superior nian iha Austrália.

TLPDP mós fasilita programa kursu kona-bá investigasaun, tránzitu, polísia komunitária, inklui programa espesialidade balu mós sira fó apoiu no to’o iha parte infra-estrutura nian.

Lee Mós : Governu Kontinua Kapasita Feto PNTL

Jornalista: Rogério Pereira Cárceres